កីឡាការិនីប៉េតង់កម្ពុជា អ៊ុក ស្រីមុំ ទទួលមេដាយមាសផ្លូវការ នៃកីឡាពិភពលោក នៅសហរដ្ឋអាមេរិក
កីឡាការិនីប៉េតង់កម្ពុជា អ៊ុក ស្រីមុំ បានឈ្នះមេដាយមាស ដែលជាកំណត់ត្រាប្រវត្តិសាស្ត្រថ្មីមួយ សម្រាប់ការចូលរួមលើកដំបូងនៅព្រឹត្តិការណ៍កីឡាពិភពលោក (World Games Birmingham, USA) នៅទីក្រុង Birmingham រដ្ឋ Alabama សហរដ្ឋអាមេរិក ទទួលបានមេដាយមាស ក្នុងពិធីបំពាក់មេដាយជាផ្លូវការ បន្ទាប់ពីបានយកឈ្នះកីឡាការិនីម្ចាស់ផ្ទះសហរដ្ឋអាមរិក Rebecca នៅវគ្គផ្តាច់ព្រ័ត្រ ដោយលទ្ធផល ៤១ទល់២១ នៅព្រឹកព្រលឹម (ម៉ោងនៅកម្ពុជា) ថ្ងៃទី១៣ ខែកក្កដា ឆ្នាំ២០២២។
មុនឈានដល់វគ្គផ្តាច់ព្រ័ត្រ កីឡាការិនីប៉េតង់ដ៏ឆ្នើមរបស់កម្ពុជា អ៊ុក ស្រីមុំ ធ្វើបានយ៉ាងល្អ នៅវគ្គជម្រុះ ក្នុងចំណោមកីឡាការិនីមកពី៨ប្រទេស ដូចជាកាណាដា បារាំង កម្ពុជា ដាណឺម៉ាក ប៊ែលហ្ស៊ីក អាល្លឺម៉ង់ សហរដ្ឋអាមេរិក និងថៃ ហើយកម្ពុជាឈរនៅចំណាត់ថ្នាក់លេខ១ ក្នុងជុំទី២។ ចំពោះលទ្ធផលការប្រកួតវគ្គពាក់កណ្ដាលផ្ដាច់ព្រ័ត្រ កីឡាការិនីថៃ បានប្រកួតចាញ់ប្រកួតជាមួយកីឡាការិនីអាមេរិក ៣៧ទល់៣៨ ខណៈកម្ពុជាបានយកឈ្នះ ដាណឺម៉ាក ដោយលទ្ធផល ៣៧ទល់២៣។
ជាមួយនឹងជ័យជម្នះនៅវគ្គពាក់កណ្តាលផ្តាច់ព្រ័ត្រ កីឡាការិនីកម្ពុជា អ៊ុក ស្រីមុំ បានឡើងមកប៉ះជាមួយកីឡាការិនីម្ចាស់ផ្ទះអាមេរិក Rebecca នៅវគ្គផ្ដាច់ព្រ័ត្រ ហើយកីឡាការិនី អ៊ុក ស្រីមុំ ដណ្តើមបានមេដាយមាសតែម្តងជាមួយនឹងលទ្ធផលដ៏ល្អ ៤១ទល់២១។ អ្វីជាការកត់សម្គាល់ ក្នុងរយៈពេល២ឆ្នាំចុងក្រោយនេះ (២០២១-២០២២) កីឡាការិនី អ៊ុក ស្រីមុំ បានឈ្នះមេដាយមាស២គ្រឿងជូនជាតិពីការប្រកួតជើងឯកពិភពលោក ឆ្នាំ២០២១ នៅប្រទេសអេស្ប៉ាញ និងកីឡាពិភពលោក នៅសហរដ្ឋអាមេរិក នាពេលនេះ។
បើតាមការបញ្ជាក់ពីកញ្ញា គីន សំណាង អគ្គលេខាធិការរង សហព័ន្ធកីឡាប៊ូល និងប៉េតង់កម្ពុជា ដែលកំពុងដឹកនាំប្រតិភូកីឡាប៉េតង់កម្ពុជាចូលរួមប្រកួតកីឡាពិភពលោក នៅសហរដ្ឋអាមេរិកបានឲ្យដឹងថា ដោយមានជាង១០០ប្រទេសចូលរួម និងមាន៣៤ប្រភេទកីឡា ខណៈកម្ពុជាបានបញ្ជូន១ប្រភេទកីឡាប៉េតង់កម្ពុជាចូលរួម (កីឡាការិនី២នាក់ លេង២វិញ្ញាសា)។
នេះជាការចូលរួមជាលើកដំបូងរបស់កម្ពុជា ហើយក៏ជាលើកដំបូងរបស់ប្រភេទកីឡាប៉េតង់កម្ពុជាផងដែរ ហើយកម្ពុជាបានកសាងកំណត់ត្រាជាប្រវត្តិសាស្ត្រថ្មីមួយ នៅក្នុងការប្រកួតកីឡាពិភពលោក ដែលប្រារព្ធធ្វើឡើងរៀងរាល់ ៤ឆ្នាំម្តង។
កម្ពុជា នៅសល់១ប្រកួតទៀតក្នុងដៃលើប្រភេទកីឡាប៉េតង់ដដែលនេះ លើវិញ្ញាសា ២នាក់ទល់២នាក់ ដោយកីឡាការិនី អ៊ុក ស្រីមុំ ចាប់ដៃគូជាមួយកីឡាការិនី អ៊ុន ស្រីយ៉ា។ វិញ្ញាសានេះមាន៨ប្រទេសចូលរួម ដោយចែកចេញជាពីរពូល ដោយកម្ពុជាស្ថិតនៅក្នុងពូល ជាមួយកាណាដា បារាំង ដាណឺមាក រីឯពូល១ទៀត រួមមានអាល្លឺម៉ង់ ប៊ែលហ្សិក ថៃ និងម្ចាស់ផ្ទះ អាមេរិក។
ការប្រកួតនេះនឹងស្វែងរកក្រុមចំណាត់ថ្នាក់លេខ១ និងលេខ២នៃពូលទាំងពីរ ឡើងប្រកួតខ្វែង នៅវគ្គពាក់កណ្តាលផ្តាច់ព្រ័ត្រ ហើយ២ក្រុមឈ្នះៗនឹងបានឡើងទៅដណ្តើមមេដាយមាស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។