ចំបាប់កម្ពុជាឈ្នះមេដាយ១៩គ្រឿង ក្នុងឋានៈម្ចាស់ផ្ទះ ជើងឯកអាស៊ីអាគ្នេយ៍ ២០២២
អត្តពលិកកីឡាចំបាប់កម្ពុជា ក្នុងឋានៈម្ចាស់ផ្ទះ ការប្រកួតកីឡាចំបាប់ជើងឯកអាស៊ីអាគ្នេយ៍ ឆ្នាំ២០២២ ឈរនៅចំណាត់ថ្នាក់លេខ៣ ក្នុងចំណោម៧ប្រទេស ជាមួយមេដាយសរុប ១៩គ្រឿង នៅសាកលវិទ្យាល័យភូមិន្ទភ្នំពេញ ពីថ្ងៃទី១៦-១៨ ខែធ្នូ ឆ្នាំ២០២២។
មេដាយសរុប១៩គ្រឿងរបស់កម្ពុជា មានមេដាយមាស ៣គ្រឿង មេដាយប្រាក់៦ និងសំរឹទ្ធ១៣គ្រឿង ខណៈវៀតណាមឈរលេខ១ ជាមួយមេដាយច្រើនរហូតដល់ ៣០គ្រឿង ក្នុងនោះមេដាយមាស ១៨ មេដាយប្រាក់ ១១ និងសំរឹទ្ធ១។ រីឯ ឥណ្ឌូណេស៊ី ឈរលេខ២ មេដាយមាស ៦ ប្រាក់៩ និងសំរឹទ្ធ៣។
ថ្លែងក្រោយបញ្ចប់ព្រឹត្តិការណ៍ដែលបញ្ចប់ដោយជោគជ័យ ក្រោមស្នាមញញឹមនៃបណ្តាប្រទេសអាស៊ីអាគ្នេយ៍ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងជាប្រធានសហព័ន្ធកីឡាចំបាប់អាស៊ីអាគ្នេយ៍បានវាយតម្លៃខ្ពស់ ចំពោះការខិតខំរៀបចំការប្រកួតចំបាប់អន្តរជាតិ ជាលើកដំបូងនៅកម្ពុជា ប្រកបដោយរលូន ដើម្បីត្រៀមឆ្ពោះទៅធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
លោក ខេស៊ី បាណេត អះអាងថា មេដាយសរុប១៩គ្រឿងរបស់ប្រភេទកីឡាចំបាប់កម្ពុជា នាពេលនេះ ជាចំនួនមេដាយច្រើនបំផុត ក្នុងប្រវត្តិប្រកួតអាស៊ីអាគ្នេយ៍ របស់ប្រភេទកីឡាចំបាប់ កន្លងមក។ បន្ថែមពីលើនេះ បណ្តាប្រទេសអាស៊ីអាគ្នេយ៍ចូលរួមនៅកម្ពុជាទាំងអស់បានកោតសរសើរយ៉ាងខ្លាំងចំពោះការរៀបចំ បដិសណ្ឋារកិច្ច និងការប្រកួត ប្រកបដោយលក្ខណៈល្អប្រសើរ និងយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។