ឆេះខុនដូ ជាន់ទី៤០ ជាប់មាត់ទន្លេចៅប្រាយ៉ា ប្រទេសថៃ តែមិនមានអ្នករងរបួស
បាងកក៖ ប៉ូលីសបាននិយាយថា យូនីតខុនដូមួយ នៅក្នុងអគារខ្ពស់ដ៏ប្រណិតមួយ នៅច្រាំងទន្លេចៅប្រាយ៉ា ក្នុងទីក្រុងបាងកក ត្រូវបានខូចខាតដោយសារភ្លើងឆេះ កាលពីរសៀលថ្ងៃចន្ទសប្តាហ៍នេះ ។
ប៉ូលិសបានរាយការណ៍ពីការខូចខាតទ្រព្យសម្បត្តិ ប៉ុន្តែមិនមានអ្នករងរបួសទេ ។ ប៉ុស្តិ៍នគរបាលត្រូវបានជូនដំណឹង នៅម៉ោងប្រហែល ១៖៣០ រសៀល អំពីអគ្គីភ័យនៅជាន់ទី ៤០ នៃ Saichol Mansion B ដែលជាអគារខុនដូ ៤២ ជាន់នៅលើផ្លូវ Charoen Nakhon ក្នុងសង្កាត់ Bang Lampu Lang ។
ក្រុមមន្ត្រីបានជម្លៀសប្រជាជនថៃ និងបរទេសជាង ១០០នាក់ចេញពីអគារនេះ ហើយក្រុមពន្លត់អគ្គីភ័យបានពន្លត់ភ្លើងក្នុងរយៈពេលប្រហែល ១៥នាទី ។
ប៉ូលិសបាននិយាយថា អគ្គិភ័យបានបំផ្លាញទំហំ ២០ម៉ែត្រការ៉េ នៅខាងក្នុងបន្ទប់ខុនដូ ។ សម្ភារដែលរងការខូចខាតរួមមានគ្រែធំមួយ និងសម្ភារក្នុងផ្ទះមួយចំនួនទៀត ។
ប៉ូលិសបាននិយាយថា បន្ទប់នោះជួលដោយគ្រួសារជនជាតិឥណ្ឌាដែលមានគ្នា ៥នាក់។ អគ្គីភ័យដែលគេសង្ស័យថា បណ្តាលមកពីឆ្លងចរន្តអគ្គិសនី តែគ្មានអ្នកណានៅក្នុងបន្ទប់ ពេលកើតហេតុទេ។ ក្រុមគ្រួសារនឹងត្រូវសាកសួរនៅពេលក្រោយជាផ្នែកនៃការស៊ើបអង្កេតរកមូលហេតុនៃការឆេះនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។