ការឈូសឆាយដីព្រៃលិចទឹកនៅតំបន់៣នៅភូមិជីលា មានការឃុបឃិតពីមន្ត្រីជាលក្ខណៈប្រព័ន្ធ
ប្រជាពលរដ្ឋនៅក្នុងឃុំកំពង់គោ ស្រុកកំពង់ស្វាយ បានឲ្យដឹងថា បើកគ្មានការបើកដៃពីលោក សៅ វណ្ណសិរីវុធ នាយសង្កាត់រដ្ឋបាលជលផលកំពង់ស្វាយ ក៏ដូចជាពីមេឃុំ កំពង់គោ និងពីសំណាក់អភិបាលស្រុកកំពង់ស្វាយ ទេនោះគឺគ្មានជនល្មើសណាហ៊ានប្រើគ្រឿងចក្រឈូសឆាយទន្ទ្រានកាន់កាប់ដីព្រៃលិចទឹកក្នុងតំបន់៣ នៅភូមិជីលា ដូចសព្វថ្ងៃនេះឡើយ។
ប្រភពដដែរបានអោយដឹងបន្ថែមទៀតថា ក្រុមជនល្មើសម្ចាស់គ្រឿងចក្រ ដែលធ្វើសកម្ម ភាព ឈូសឆាយបំផ្លាញព្រៃលិចទឹកទន្ទ្រាន កាន់កាប់យកធ្វើជាកម្មសិទ្ធិនោះ គឺអាចមានការឃុបឃិតបើក ដៃពីសំណាក់ មេឃុំកំពង់ស្វាយ និងលោក អ៊ុន បុក្រ អភិបាលស្រុកកំពង់ស្វាយ ផងដែរទើបអ្វីៗអាចប្រព្រឹត្តទៅដោយរលូន។ ដូច្នេះលោក សុខ លូ អភិបាលខេត្តកំពង់ធំ ក៏ដូចជាថ្នាក់ដឹកនាំក្រសួងនិងស្ថាប័ណ្ណពាក់ព័ន្ធមិនគួរបណ្ដែតបណ្ដោយតទៅទៀតទេ ព្រោះសកម្មភាពឈូសឆាយទន្ទ្រានកាន់កាប់ដីព្រៃលិចទឹកក្នុងតំបន់៣ នៅភូមិជីលា ឃុំកំពង់គោ ស្រុកកំពង់ស្វាយ កំពុងកើតឡើងយ៉ាងរាលដាលហើយការបង្ក្រាបរបស់សមត្ថកិច្ចពាក់ព័ន្ធគ្រាន់តែធ្វើឲ្យល្អមើលប៉ុណ្ណោះ។
សេចក្ដីរាយការណ៍ពីប្រជាពលរដ្ឋរស់នៅឃុំកំពង់គោ ស្រុកកំពង់ស្វាយ ខេត្តកំពង់ធំ បានឲ្យដឹងថា បច្ចុប្បន្នបទល្មើសឈូសឆាយទន្ទ្រានកាន់កាប់ដីព្រៃលិចទឹកនៅចំណុចព្រះស្នែង កំពុងកើតមានយ៉ាងពេញបន្ទុក ហើយមន្ត្រីអាជ្ញាធរនិងមន្ត្រីពាក់ព័ន្ធមិនចាត់វិធានការបង្ក្រាបបទល្មើសនោះទេ។ ប្រភពពីប្រជាពលរដ្ឋបានឲ្យដឹងថាលោក សៅ វណ្ណសិរីវុធ នាយសង្កាត់រដ្ឋបាលជលផលកំពង់ស្វាយ បិទភ្នែក បិទច្រមុះ ឃុបឃិតជាមួយជនល្មើសឈូសឆាយបំផ្លាញព្រៃលិចទឹកយ៉ាងពេញបន្ទុក។
លោក សុខ លូ អភិបាលខេត្តកំពង់ធំ ក៏ដូចជាលោក ធីវ វណ្ណធីរ ប្រធានមន្ទីរកសិកម្មខេត្តកំពង់ធំ និងលោក ប៉ែន វណ្ណរិទ្ធ នាយខណ្ឌរដ្ឋបាលជលផលខេត្តកំពង់ធំ មិនមានចំណាត់ការចុះបង្ក្រាបបទល្មើសឈូសឆាយបំផ្លាញព្រៃលិចទឹកនៅតំបន់ព្រះស្នែង នោះសោះ។តែបើប្រជាពលរដ្ឋដែលប្រើកាំបិតនិងពូថៅ កាប់ឆ្ការដីព្រៃបន្តិចបន្តួចគឺចៀសមិនផុតពីការបង្ក្រាបរបស់មន្ត្រីអាជ្ញាធរមូលដ្ឋាន មន្ត្រីរដ្ឋបាលជលផល និងសមត្ថកិច្ចពាក់ព័ន្ធនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។