មេខ្លោងឆបោករថយន្ត៤២គ្រឿងយកទៅបញ្ចាំ ត្រូវតុលាការផ្ដន្ទាទោសឲ្យជាប់ពន្ធនាគារសរុប២០ឆ្នាំ
ស្ត្រីចំនួន២នាក់ដែលជាមេក្លោងឆបោកយករថយន្តដល់ទៅ៤២គ្រឿងទៅបញ្ចាំតាមកុងសុីនានានោះ ត្រូវចៅក្រមសាលាដំបូងរាជធានីភ្នំពេញ ប្រកាសសាលក្រមលើសំណុំរឿងទី១០ កាលពីព្រឹកមិញ ដោយសម្រេចផ្ដន្ទាទោសបន្ថែម២ឆ្នាំទៀត ក្រោមការចោទប្រកាន់ពីបទឆបោក និងបទរំលោភលើទំនុកចិត្ត តាមមាត្រា៣៩១ និងមាត្រា៣៩២នៃក្រមព្រហ្មទណ្ឌ។ ដូច្នេះនៅក្នុងរឿងក្ដីឆបោករថយន្តទាំ៤២គ្រឿង ជនជាប់ចោទត្រូវជាប់ពន្ធនាគារសរុប២០ឆ្នាំ ព្រមទាំងត្រូវសងរថយន្តនិងសងប្រាក់ទៅម្ចាស់រថយន្តជាច្រើនសែនដុល្លារទៀត។
ជនសង្ស័យទាំង២នោះ ១.ឈ្មោះ ឃាម រដ្ឋា ហៅ យ៉ា ភេទស្រី អាយុ៣៥ឆ្នាំ និង២.ឈ្មោះ ផេង លី ហៅ ដា ភេទស្រី អាយុ៣៣ឆ្នាំ ចំណែកឈ្មោះ ឈាន ភក្ដី ហៅស្រម៉ូម ត្រូវបានចៅក្រមស៊ើបសួរលើកលែងចោទ និងដោះលែងទៅវិញបាត់ហើយ។
សូមបញ្ជាក់ថា រឿងក្ដីនេះតុលាការបានបំបែកសំណុំរឿងតាមអង្គហេតុនីមួយៗដោយកាត់ទោសម្ដងមួយករណីៗសរុបចំនួន១០ករណី ដោយក្នុងរឿងនីមួយៗតុលាការបានផ្ដន្ទាទោសជនជាប់ជាប់រយៈពេល២ឆ្នាំ និងបង្គាប់ឲ្យសងរថយន្តទៅតាមតម្លៃទីផ្សារជាក់ស្ដែង រហូតដល់គ្រប់ទាំង៤២គ្រឿង ប៉ុន្តែជាក់ស្ដែងជនជាប់ចោទគ្មានប្រាក់សងវិញទេ អ្នកឈ្នះក្ដីបានទទួលត្រឹមតែសាលក្រមប៉ុណ្ណោះ។
គួរបញ្ជាក់ថា កាលពីថ្ងៃទី១០ ខែមេសា ឆ្នាំ២០១៨ សមត្ថកិច្ចជំនាញនៃការិយាល័យបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានឃាត់ខ្លួនជនសង្ស័យឈ្មោះ ឃាម រដ្ឋា ហៅយ៉ា យកមកសួរនាំ។ តាមវិធានជំនាញរបស់អាវុធហត្ថរាជធានីភ្នំពេញ ក៏ដូចជាចំលើយសារភាពរបស់ជនរងគ្រោះបានឲ្យដឹងថា រូបនាងពិតជាបានជួលរថយន្តគេចំនួន១២គ្រឿងពិតប្រាកដមែន។
នៅថ្ងៃទី១២ ខែមេសា ឆ្នាំ២០១៨ កម្លាំងជំនាញ នៃការិយាល័យបទល្មើសព្រហ្មទណ្ឌ អាវុធហត្ថរាជធានីភ្នំពេញ បានឃាត់ខ្លួនជនសង្ស័យជាប់ពាក់ព័ន្ធ ចំនួន២នាក់បន្ថែមទៀតគឺឈ្មោះ ឈ័ន ភក្តី ហៅ ស្រម៉ូម ហៅ ពន្លក ភេទប្រុស និងឈ្មោះ ផេង លី ហៅ ដា ភេទស្រី។
តាមចម្លើយសារភាពរបស់ជនសង្ស័យទាំងបី សមត្ថកិច្ចអាវុធហត្ថ រាជធានីភ្នំពេញ បានរកឃើញជនរងគ្រោះ១៤នាក់ផ្សេងទៀត ដែលចាញ់កលល្បិច ក្រុមឆបោកទាំង៣នាក់នេះដូចគ្នា ហើយសមត្ថកិច្ចបាន ទំនាក់ទំនងជនរងគ្រោះ ទាំង១៤នាក់មកដាក់ពាក្យបណ្តឹង។
ដោយយោងលើភស្តុតាងស៊ីសង្វាក់មិនអាចប្រកែកបាន ជនសង្ស័យទាំងបីនាក់ ព្រមសារភាពជាលើកទី២ថា ក្រុមខ្លួនពិតជាបានជួលរថយន្តពីជនរងគ្រោះយកមកបញ្ចាំនិងដាក់ជួលបន្តពិតប្រាកដមែន តែមិនមែនជួល៣៤គ្រឿងនោះទេ គឺពួកនាងបានជួលរហូតដល់ទៅ៤២គ្រឿង ពីជនរងគ្រោះ១៦នាក់ និងជនរងគ្រោះផ្សេងទៀត ដែលសមត្ថកិច្ចមិនទាន់អាចទាក់ទងមកដាក់ពាក្យបណ្តឹងបាន។
សរុបរថយន្តទាំង៤២គ្រឿងដែលជនសង្ស័យបានជួលពីជនរងគ្រោះមក គឺជនសង្ស័យយកទៅបញ្ចាំអស់ចំនួន៣៤គ្រឿង និងយកទៅជួលបន្តចំនួន៨គ្រឿង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។