ឯកឧត្តម វេង សាខុន និងលោកជំទាវ អញ្ចើញចូលរួមកាន់អង្គពុទ្ធាភិសេកសម្ពោធឆ្លងសមិទ្ធិផលវត្តពោធិវ័នកោះប៉ែនខេត្តត្បូងឃ្មុំ
ក្នុងបរិវេណវត្តពោធិវ័នកោះប៉ែន ភូមិកោះប៉ែន ឃុំកោះមិត្ត ស្រុកកំពង់សៀម នៅព្រឹកថ្ងៃថ្ងៃទី១៦ ខែកុម្ភ: ឆ្នាំ ២០១៩ ឯកឧត្តម វេង សាខុន ប្រធានក្រុមការងារថ្នាក់កណ្តាលចុះជួយស្រុកកំពង់សៀម ខេត្តកំពង់ចាម និងលោកជំទាវ ម៉ក់ ស៊ីថា បានអញ្ជើញចូលរួមបុណ្យកាន់អង្គ ពុទ្ធាភិសេក សម្ភោធឆ្លងសមិទ្ធផលនានា និងជួបសំណេះសំណាលជាមួយបងប្អូនពុទ្ធិបរិស័ទចំណុះជើងវត្ត ព្រះសង្ឃ លោកគ្រូ អ្នកគ្រូ សិស្សានុសិស្ស អាជ្ញាធរមូលដ្ឋាន សមាជិកក្រុមការងារចុះជួយឃុំ ប្រមាណ៨០០នាក់ ប្រកបដោយទឹកចិត្តសប្បាយរីករាយ។
លោក ប៊ិន ឡាដា អភិបាលស្រុកកំពង់សៀមបានរាយការណ៍ជូនអង្គពិធីជ្រាបដោយសង្ខេបពីប្រវត្តិវត្តពោធិវ័នកោះប៉ែនថា វត្តនេះមានអាយុកាល ២២៤ឆ្នាំ ហើយបច្ចុប្បន្នដោយមានការចូលរួមឧបត្ថម្ភ គាំទ្រយ៉ាងសស្រាក់សស្រាំ ពីសំណាក់ឯកឧត្តមប្រធានក្រុមការងារ ឯកឧត្តម លោកជំទាវសមាជិក ក្រុមការងារ សប្បុរសជន ពុទ្ធិបរិស័ទ បានកសាង និងជួសជុលវត្តបានល្អប្រសើរឡើងវិញសាកសមជាទីសការៈ គោរពប្រតិបត្តិតាមប្រពៃណី សាសនា របស់បងប្អូនទូទាំងភូមិកោះប៉ែន។
បើទោះបីមានភារកិច្ចដ៏មមាញឹកក្នុងកិច្ចការផ្នែកអាណាចក្រយ៉ាងណាក្តី ឯកឧត្តមឆ្លៀតពេលសម្រាកចុងសប្តាហ៍ចុះមកបំពេញការងារផ្នែកពុទ្ធចក្រ និងសាកសួរសុខទុក្ខបងប្អូននៅមូលដ្ឋានផ្ទាល់ដើម្បីស្វែងយល់បន្ថែមទៀតពីសេចក្តីត្រូវការចាំបាច់ក្នុងជីវភាពប្រចាំថ្ងៃ ការងារបង្កបង្កើនផល និងបញ្ហាផ្សេងៗដើម្បីធ្វើការកែលម្អ ដោះស្រាយជូនតាមការចាំបាច់ ក្នុងបំណងធ្វើយ៉ាងណាលើកកំពស់កម្រិតជីវភាព សេចក្តីសុខសប្បាយរបស់ប្រជាពលរដ្ឋឲ្យបានល្អប្រសើរតាមអ្វីដែលរាជរដ្ឋាភិបាលប្រាថ្នាចង់បាន ជាពិសេសលើកតម្កើងការគោរពត្រង់ត្រាប់ប្រណិបត្តិប្រពៃណី ទំនៀមទម្លាប់ ជំនឿសាសនារបស់បងប្អូនពុទ្ធសាសនិកជននៅទឹកដីកោះប៉ែន។ ស្ថិតក្នុងបរិយាកាសដ៏សែនមនោរម្យ ក្នុងនាមប្រធានក្រុមការងារ សហការី និងអាជ្ញាធរមូលដ្ឋាន លោកបានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសម្តេចតេជោហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តី និងសម្តេចកិត្តិព្រឹទ្ធបណ្ឌិតដែលជានិច្ចកាលសម្តេចតែងតែយកចិត្តទុកដាក់ គិតគូពីបញ្ហាសុខទុក្ខ និងជីវភាពរបស់បងប្អូន ហើយបានជូនពរឲ្យបងប្អូនទាំងអស់ជួបតែពុទ្ធពរទាំង ៤ប្រការ។
ឆ្លៀតយកឱកាសដ៏មានតម្លៃនេះ លោកបានជម្រាបជូនបងប្អូនអំពីដំណើរការវិវឌ្ឍរបស់ប្រទេសជាតិដោយសង្ខេបក្រោមការដឹកនាំរបស់រាជរដ្ឋាភិបាលដែលមានសម្តេចតេ ជោសែនជានាយករដ្ឋមន្ត្រី ដូចជាវិស័យកសិកម្ម សេដ្ឋកិច្ច ហេដ្ឋារចនាសម្ព័ន្ធ និងទេសចរណ៍ ជាពិសេសយើងរក្សាបាននូវសុខសន្តិភាព ស្ថិរភាព និងការអភិវឌ្ឍសង្គមបានយ៉ាងល្អប្រសើរ។ សមិទ្ធផលដ៏ធំធេងនេះ បានទាក់ទាញការ វិនិយោគដើម្បីចូលរួមបង្កើតការងារ បង្កើនចំណូល រក្សាកំណើនសេដ្ឋកិច្ច លំហូរទេសចរណ៍ បង្កលក្ខណៈ ងាយស្រួលក្នុងការនាំចេញកសិផល និងផលិតផលផ្សេងៗ ហើយប្រាកដណាស់អាចឈានទៅប្រែក្លាយប្រទេស យើងឲ្យទៅជាប្រទេសមានចំណូលមធ្យមកម្រិតខ្ពស់នាឆ្នាំ២០៣០ ស្របតាមចក្ខុវិស័យរបស់សម្តេចតេជោសែន។ ដើម្បីរក្សាបាននូវស្ថិរភាពសង្គម និងកំណើនសេដ្ឋកិច្ច លោកបានក្រើនរំលឹងដល់មន្រ្តី អាជ្ញាធរមូលដ្ឋាន កងកំលាំងប្រដាប់អាវុធគ្រប់លំដាប់ថ្នាក់ត្រូវខិតខំយកចិត្តទុកដាក់អនុវត្តអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ សែន គឺត្រូវចុះមកបម្រើពលរដ្ឋដោយស្មោះត្រង់ ពេញ លេញ សកម្ម ទូលំទូលាយ ទាន់ពេលវេលា មានការទទួលខុសត្រូវ និងមាន ប្រសិទ្ធភាពខ្ពស់ និងជាពិសេសរក្សាឲ្យបាននូវសាមគ្គីភាព ឯកភាពជាតិ ប្រឆាំងដាច់ខាតនូវចលនាបដិវត្តន៍ពណ៌ ពាក្យញុះញង់ មួលបង្កាច់ បំផុសបំផុល អូសទាញរបស់ជនអគតិ ដែលអាចនាំឲ្យប្រទេសជាតិធ្លាក់ក្នុងគ្រោះ មហន្តរាយជាថ្មីម្តងទៀត។
នាឱកាសនេះឯកឧត្តម និងសហការីបានជួយឧបត្ថម្ភថវិកាចំនួន ៣៩១២ ដុល្លារ យកទៅប្រើប្រាស់តាមការ ចាំបាច់ក្នុងវត្ត ហើយបានជូនសមាជិក សមាជិកាក្នុងអង្គពិធីម្នាក់ៗ ១ម៉ឺនរៀលផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។