ជើងហោះហើរត្រង់ពីម៉ានីល មកភ្នំពេញ នឹងជួយជម្រុញកំណើនទេសចរមកកម្ពុជាបន្ថែមទៀត
ខណៈដែលក្រុមហ៊ុនអាកាសចរ Philippines Airline បានប្រកាសថា ខ្លួននឹងបើកជើងហោះហើរត្រង់ពីទីក្រុងម៉ានីល មកកាន់រាជធានីភ្នំពេញ នៅដើមខែមេសាខាងមុខ លោក ថោង ខុន រដ្ឋមន្រ្តីក្រសួងទេសចរណ៍កម្ពុជាបានថ្លែងដោយរំពឹងថា ជើងហោះហើរត្រង់នេះ នឹងជួយជម្រុញកំណើនទេសចរពីហ្វីលីពីន និងប្រទេសទី៣ទៀត មកកាន់ប្រទេសកម្ពុជាឲ្យកាន់តែច្រើន។
លោក ថោង ខុន បានថ្លែងនៅក្នុងជំនួបពិភាក្សាជាមួយលោក Jaime J. Bautista ប្រធានក្រុមហ៊ុនអាកាសចរ Philippines Airline កាលពីពេលថ្មីៗនេះថា ការតភ្ជាប់ជើងហោះហើរត្រង់ម៉ានីល-ភ្នំពេញនេះ គឺជាប្រវត្តិសាស្ត្រលើកដំបូងរបស់កម្ពុជា ពីព្រោះតាំងពីឆ្នាំ១៩៧០មក កម្ពុជាមិនទាន់មានជើងហោះហើរត្រង់ណាមួយ ពីភ្នំពេញទៅមកម៉ានីលឡើយ ប៉ុន្តែដោយសារកម្ពុជាបច្ចុប្បន្នមានសន្តិភាព ស្ថិរភាព និងការអភិវឌ្ឍ ទើបក្រុមហ៊ុនអាកាសចរ Philippines Airline ក៏ដូចជាក្រុមហ៊ុនអាកាសចរក្រៅប្រទេសដទៃទៀត ពង្រីកការតភ្ជាប់ជើងហោះហើរត្រង់បែបនេះ។ ម្យ៉ាងវិញទៀត កត្តាដែលជំរុញឲ្យមានការហោះហើរត្រង់នេះ ក៏ដោយសារនិន្ននាការរបស់ភ្ញៀវទេសចរបច្ចុប្បន្នផងដែរ ពោលគឺពួកគេនិយមចូលចិត្តការហោះហើរត្រង់ ងាយស្រួល និងប្រើពេលខ្លីឆាប់ដល់គោលដៅ។
គួរជំរាបដែរថា បច្ចុប្បន្នក្រុមហ៊ុនអាកាសចរមួយរបស់ហ្វីលីពីន ក៏បានហោះហើរត្រង់ពីទីក្រុងសេប៊ូ (ទីក្រុងមួយនៅលើកោះសេប៊ូ នៃប្រទេសហ្វីលីពីន) មកក្រុងសៀមរាបផងដែរ ដោយក្នុងមួយសប្ដាហ៍ហោះហើរបានចំនួន៤ជើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។