អគ្គនាយកដ្ឋានពន្ធនាគារ ចេញសេចក្តីណែនាំឲ្យបញ្ឈប់ការប្រើប្រាស់ប្រព័ន្ធទូរស័ព្ទនៅតាមមណ្ឌលអប់រំកែប្រែ និងពន្ធនាគារទូទាំងប្រទេស
បន្ទាប់ពីមានការលើកឡើងរបស់សម្តេចនាយករដ្ឋមន្រ្តីថា មានករណី នៃការប្រើប្រាស់ទូរស័ព្ទចេញពីពន្ធនាគារមកខាងក្រៅនោះ នាយកដ្ឋានពន្ធនាគារ បានសម្រេចចេញនូវសេចក្តីណែនាំភ្លាមៗ ដោយហាមមណ្ឌលអប់រំកែប្រែ និងពន្ធនាគារនៅទូទាំងប្រទេស បញ្ឈប់ការប្រើប្រាស់ប្រព័ន្ធទូរស័ព្ទ។
សេចក្តីណែនាំបានបញ្ជាដល់ប្រធានមណ្ឌលអប់រំកែប្រែ និងពន្ធនាគាររាជធានីខេត្ត ត្រូវបញ្ឈប់ការប្រើប្រាស់ប្រព័ន្ធទូរស័ព្ទដែលដាក់ឲ្យជនជាប់ឃុំប្រើប្រាស់ ចាប់ពីថ្ងៃទី០៤ ខែមីនា ឆ្នាំ២០១៩ រហូតដល់មានបទបញ្ជាថ្មី។
បង្កើនការបង្កាទប់ស្កាត់រាល់ការលួចលាក់នាំទូរស័ព្ទចល័តចូលមណ្ឌលអប់រំកែប្រែ និងពន្ធនាគារ និងពង្រឹងការត្រួតពិនិត្យ ឆែកឆេរ ដកហូតទូរស័ព្ទក្នុងមណ្ឌលអប់រំកែប្រែ និងពន្ធនាគារ ហើយករណីរកឃើញទូរស័ព្ទដែលបម្រុងនាំចូល ឬរកឃើញទូរស័ព្ទក្នុងពន្ធនាគារ ត្រូវធ្វើកំណត់ហេតុដកហូតទុក។ ចំពោះជនដែលប្រព្រឹត្តបទល្មើស ត្រូវមានវិធានការតាមផ្លូវច្បាប់ដូចមានចែងក្នុងមាត្រា៥៧១ និងមាត្រា ៥៧២ នៃក្រមព្រហ្មទណ្ឌព្រះរាជាណាចក្រកម្ពុជា និងដាក់វិន័យតាមបទបញ្ជាផ្ទៃក្នុងពន្ធនាគារ។
គួររំលឹកដែរថា ក្នុងពិធីបើកការដ្ឋានសាងសង់សំណង់ផ្សេងៗក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញកាលពីថ្ងៃទី៤ ខែមីនា ដើមសប្តាហ៍នេះ សម្តេចតេជោ ហ៊ុន សែន នាយករដ្ឋមន្រ្តី បានធ្វើការរិះគន់ខ្លាំងៗចំពោះនាយកដ្ឋានពន្ធនាគារ ដោយបានអនុញ្ញាតឲ្យអ្នកជាប់ឃុំក្នុងពន្ធនាគារអាចទូរស័ព្ទចេញមកខាងក្រៅដោយសេរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។