មន្រ្ដីជាន់ខ្ពស់ក្រសួងសាធារណការ៖ មិនទាន់ទទួលព័ត៌មាន សម្រាប់កិច្ចព្រមព្រៀងសាងសង់ស្ពានស្វាយជ្រុំ ក្នុងដំណើរទស្សនកិច្ចប្រធានាធិបតីកូរ៉េមកកម្ពុជានោះទេ
មន្រ្ដីជាន់ខ្ពស់ក្រសួងសាធារណការ និងដឹកជញ្ជូន បានអះអាងថា ក្នុងដំណើរទស្សនកិច្ចរបស់ ប្រធានាធិបតិកូរ៉េខាងត្បូងមកកាន់កម្ពុជា ចាប់ពីថ្ងៃទី១៤ ដល់ថ្ងៃទី១៦ ខែមីនាខាងមុខនេះ គឺក្រសួងនៅមិនទាន់ទទួលព័ត៌មាន ឬក៏មានកិច្ចព្រមព្រៀងជាមួយភាគីកូរ៉េក្នុងការសាងសង់ ស្ពានឆ្លងទន្លេមេគង្គ ពីតំបន់ជ្រោយចង្វារទៅកាន់តំបន់ស្វាយជ្រុំនោះទេ។
លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានថ្លែងថា រហូត មកដល់ពេលនេះ នៅមិនទាន់ទទួលព័ត៌មានស្ដីពីកិច្ចព្រមព្រៀងសាងសង់ស្ពានឆ្លងកាត់ទន្លេ មេគង្គ តំបន់ស្វាយជុំខាងលើនេះនៅឡើយទេ។
បើតាមសេចក្តីប្រកាសព័ត៌មានរបស់ក្រសួងការបរទេស ក្នុងដំណើរទស្សនកិច្ចនៅកម្ពុជា ឯកឧត្តមប្រធានាធិបតីនៃសាធារណរដ្ឋកូរ៉េ និងភាគីកម្ពុជាសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងមួយចំនួន។ ប៉ុន្តែក្រសួងការបរទេសមិនបានបញ្ជាក់លម្អិតថា កិច្ចព្រមព្រៀងអ្វីខ្លះដែលថ្នាក់ដឹកនាំប្រទេសទាំងពីរនឹងត្រូវចុះហត្ថលេខានោះទេ។
សូមជម្រាបថា គម្រោងសាងសង់ស្ពានជ្រោយចង្វា-ស្វាយជ្រុំនេះ ត្រូវបានភាគីចិន សិក្សាចប់ម្តងរួចហើយ ប៉ុន្តែបច្ចុប្បន្ន គម្រោងនេះ គឺស្ថិតក្រោមការសិក្សាគម្រោងរបស់ភាគីប្រទេសកូរ៉េវិញម្តង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។