តំណាងក្រុមហ៊ុន NIKE ថា ខ្លួនកំពុងពង្រីកការបញ្ជាទិញបន្ថែមពីកកម្ពុជា
តំណាងក្រុមហ៊ុន NIKE ពិភពលោក ដែលជាអ្នកបញ្ជាទិញដ៏ធំលើផលិតផលសម្លៀកបំពាក់ និងស្បែកជើងនៅក្នុងប្រទេសកម្ពុជា បានលើកឡើងថា ក្រុមហ៊ុនកំពុងស្វែងរកការពង្រីកទីផ្សារបន្ថែមនៅកម្ពុជា ក្រោយពីមើលឃើញថា វិស័យវាយភណ្ឌក្នុងប្រទេសកម្ពុជា មានការរីកចម្រើនគួរឲ្យកត់សម្គាល់។
ក្នុងជំនួបជាមួយរដ្ឋមន្រ្ដីក្រសួងពាណិជ្ជកម្មកម្ពុជា កាលពីពេលថ្មីៗនេះ លោក គ្រីស ហ៊ែលហ្សឺ (Chris Helzer) តំណាង និងជាអនុប្រធាន ក្រុមហ៊ុន NIKE ទទួល បន្ទុកពាណិជ្ជកម្មសកល និងកិច្ចការរដ្ឋាភិបាល បានបង្ហាញពីមោទនភាព ដែលក្រុមហ៊ុនអាច បង្កើតការងារជូនប្រជាជនកម្ពុជាបានចំនួន ៤៥០០០នាក់ តាមរយៈការបញ្ជាទិញសម្លៀកបំពាក់ និងស្បែកជើងពីរោងចក្រជាដៃគូ ចំនួន៧។ លោកបានបន្ដថា បច្ចុប្បន្ន ក្រុមហ៊ុនកំពុង ស្វែងរកឱកាសពង្រីកនៅក្នុងប្រទេសកម្ពុជាបន្ថែមទៀត ដើម្បីនាំភាពជោគជ័យជូនប្រជាជនកម្ពុជា។
គួរបញ្ជាក់ថា សហរដ្ឋអាមេរិក និង អឺរ៉ុប គឺជាទីផ្សារនាំចេញធំជាងគេរបស់កម្ពុជា ក្នុង វិស័យវាយនភណ្ឌកាត់ដេរសម្លៀកបំពាក់ និងស្បែកជើង ហើយការនាំចេញផលិតផលកាត់ ដេរ សម្លៀកបំពាក់ និងស្បែកជើងក្នុងរយៈពេល៦ ខែឆ្នាំ២០១៨ មានកំណើនប្រមាណ ១១.១ ភាគរយ ខ្ពស់ជាងឆមាសទី១ ឆ្នាំ២០១៧ ដែលមានត្រឹមតែ៧ ភាគរយ។ នេះបើតាម របាយការណ៍ ឆមាសទី ១ របស់ធនាគារជាតិនៃកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។