ក្រុមហ៊ុនអាកាសចរណ៍ Emirates គ្រោងបើកជើងហោះហើរថ្មី ភ្ជាប់រាជធានីភ្នំពេញ និងរាជធានីបាងកក នៅខែមិថុនា ខាងមុខ
បន្ទាប់ពីធ្វើប្រតិបត្តិការហោះហើរ មកកាន់រាជធានីភ្នំពេញជាលើកដំបូងនៅក្នុងខែកក្កដា ឆ្នាំ២០១៧ ឥឡូវនេះ ក្រុមហ៊ុនអាកាសចរណ៍ Emirates នៃប្រទេសអារ៉ាប់រួម គ្រោងនឹងបើកជើងហោះហើរថ្មីមួយទៀត ដើម្បីតភ្ជាប់រាជធានីភ្នំពេញ ទៅកាន់រាជធានីបាងកក ប្រទេសថៃ សម្រាប់ ផ្តល់ជូនអតិថិជនទាំងអស់នូវការធ្វើដំណើរប្រកបដោយផាសុកភាព។
ក្នុងជំនួបពិភាក្សាការងារជាមួយ រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន់ សូរស័ក្តិ កាលពីថ្ងៃទី១៤ ខែមីនា ឆ្នាំ២០១៩ នៅទីស្ដីការក្រសួងពាណិជ្ជកម្ម លោក អាប់ឌុលឡា អេតណាន់ (Abdulla Adnan) នាយកក្រុមហ៊ុន Emirates ប្រចាំប្រទេសកម្ពុជា បានគូសបញ្ជាក់ថា Emirates ចង់ធ្វើឲ្យទីក្រុងឌុយបៃ ក្លាយជាវេទិកាតភ្ជាប់ប៉ែកខាងកើត ទៅកាន់ខាងលិច ហើយតាមរយៈជើងហោះហើរថ្មីនេះ ក្រុមហ៊ុននឹងប្រើប្រាស់យន្តហោះធុនបូអីង ៧៧៧ និងអ៊ែបើស A៣៨០ ដើម្បីដឹកនាំគណៈប្រតិភូកម្ពុជា ទៅកាន់ពិព័រណ៍ពិភពលោកឌុយបៃ ឆ្នាំ២០២០ ជាមួយបច្ចេកវិទ្យាទំនើប គ្មានទំនាញផែនដី។
ជាការឆ្លើយតប លោក ប៉ាន សូរស័ក្តិ រដ្ឋមន្រ្ដីក្រសួងពាណិជ្ជកម្មកម្ពុជាបានសម្តែងការស្វាគមន៍ចំពោះការបើកឲ្យមានជើងហើរថ្មី របស់ក្រុមហ៊ុន Emirates ដែលនឹងផ្តល់ភាពងាយ ស្រួល សម្រាប់ភ្ញៀវទេសចរ និងវិនិយោគិន ទាំងនៅក្នុងប្រទេសកម្ពុជា និងប្រទេសថៃ។
គួរបញ្ជាក់ថា ក្រុមហ៊ុនអាកាសចរណ៍ Emirates បានធ្វើប្រតិបត្តិការហោះហើរ មកកាន់ រាជធានីភ្នំពេញដំបូងនៅក្នុងខែកក្កដា ឆ្នាំ២០១៧ ដែលគិតមកទល់បច្ចុប្បន្ន ក្រុមហ៊ុនអាកាសចរណ៍មួយនេះ បានដឹកអ្នកដំណើរប្រមាណ១០ម៉ឺននាក់ និងបាន ឈ្នះពានរង្វាន់ជាប់គ្នាយ៉ាងច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។