រដ្ឋមន្រ្តីក្រសួងមហាផ្ទៃអំពាវនាវឲ្យយកចិត្តទុកដាក់បង្ការគ្រោះអគ្គិភ័យ ក្នុងរដូវប្រាំងនេះ
រដ្ឋមន្រ្តីក្រសួងមហាមន្រ្តី សម្តេចក្រឡាហោម ស ខេង នៅថ្ងៃទី១៩ មីនា ឆ្នាំ២០១៩ បានធ្វើការអំពាវនាវដល់បងប្អូនប្រជាពលរដ្ឋ អាជ្ញាធរ និងមន្រ្តីមានសមត្ថកិច្ចគ្រប់លំដាប់ថ្នាក់ សូមយកចិត្តទុកដាក់ការពារ និងបង្ការគ្រោះអគ្គិភ័យក្នុងរដូវប្រាំងនេះ។
សម្តេចបានលើកឡើងថា តាមការព្យាករណ៍ អាកាសធាតុនៅប្រទេសយើងនឹងឡើងកំដៅរហូតដល់លើស៤០អង្សា ចាប់ពីពេលនេះតទៅ រហូតដល់រយៈពេលប្រមាណពីរខែទៅមុខទៀត ដែលនឹងធ្វើឲ្យអាកាសធាតុក្តៅ ស្ងួត ហួតហែង ងាយនឹងបណ្តាលឲ្យកើតគ្រោះអគ្គិភ័យជាយថាហេតុ។ ក្នុងន័យនេះ សម្តេចសូមអំពាវនាវដល់បងប្អូនប្រជាពលរដ្ឋ អាជ្ញាធរមូលដ្ឋាន និងកងកម្លាំងមានសមត្ថកិច្ចទាំងអស់ សូមយកចិត្តទុកដាក់អនុវត្តវិធានការមួយចំនួនដូចជា៖
១-ត្រូវបង្កើនការប្រុងប្រយ័ត្នគ្រប់ពេលចំពោះដើមចមដែលអាចបង្កើតឲ្យមានគ្រោះអគ្គិភ័យដូចជា ភ្លើងចង្រ្កាន ភ្លើងចង្កៀង ភ្លើងធូប-ទៀន ការដុតសំរាម ដុតព្រៃ-ចំការ-វាលស្រែ ការបោះចោលកន្ទុយបារីផ្តេសផ្តាស ការតភ្ជាប់ ឬប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះ ឬងាយផ្ទុះឆេះ ។ល។ ដោយត្រួតពិនិត្យឲ្យបានហ្មត់ចត់ បង្ការកុំឲ្យមានការឆេះរាលដាលបង្កើតជាគ្រោះអគ្គិភ័យ។
២-អាជ្ញាធរមូលដ្ឋានត្រូវយកចិត្តទុកដាក់រៀបចំសណ្តាប់ធ្នាប់បណ្តាញអគ្គិសនី និងផ្លូវសាធារណៈនៅតំបន់ងាយរងគ្រោះ ដើម្បីបង្កលក្ខណៈងាយស្រួលដល់ការចុះអន្តរាគមន៍សង្រ្គោះបានទាន់ពេលវេលា។
៣-អង្គភាពនគរបាលបង្ការពន្លត់អគ្គិភ័យនៅតាមបណ្តារាជធានី-ខេត្ត និងនៅតាមបណ្តាស្ថានីយ៍រថយន្តអគ្គិភ័យក្រុង-ស្រុក ត្រូវបន្តយកចិត្តទុកដាក់អប់រំណែនាំប្រជាពលរដ្ឋអំពីវិធានការបង្ការអគ្គិភ័យ ឧបករណ៍សម្ភារ ប្រេងឥន្ធនៈ ទឹកស្តុក និងប្រភពយកទឹកឲ្យគ្រប់គ្រាន់ បម្រើឲ្យការងារពន្លត់ និងសង្រ្គោះ ដើម្បីធានាដល់កិច្ចអន្តរាគមន៍ចាប់រហ័ស និងមានប្រសិទ្ធភាព។
៤-ពេលមានគ្រោះអគ្គិភ័យកើតឡើង ត្រូវផ្តល់ព័ត៌មានជាបន្ទាន់មកអាជ្ញាធរមូលដ្ឋានដែលនៅជិតបំផុត ឬទាក់ទងមន្រ្តីនគរបាលបង្ការពន្លត់អគ្គិភ័យ តាមរយៈទូរស័ព្ទលេខ ១១៧ ឬ លេខ ៦៦៦ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។