អត្តសញ្ញាណប័ណ្ណគំរូចាស់ នឹងមិនត្រូវអនុញ្ញាតសម្រាប់ការស្នើធ្វើស្លាកលេខ ប័ណ្ណបើកបរ ឬប័ណ្ណសម្គាល់យានយន្តឡើយ
រដ្ឋមន្រ្តីក្រសួងសាធារណការ និងដឹកជញ្ជូនបានលើកឡើងថា រាល់អ្នកស្នើសុំសេវាទាំងអស់ពាក់ព័ន្ធថនឹងការធ្វើស្លាកលេខ ប័ណ្ណសម្គាល់យានយន្ត ឬប័ណ្ណបើកបរ ត្រូវយកអត្តសញ្ញាណប័ណ្ណគំរូថ្មីមក ទើបមន្រ្តីជំនាញធ្វើជូន បើមិនមានទេ នឹងមិនធ្វើជូនឡើយ។
ក្នុងកិច្ចប្រជុំបូកសរុបលទ្ធផលការងារសុវត្ថិភាពចរារចណ៍ផ្លូវគោក កាលពីថ្ងៃទី២០ ខែមីនា លោក ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូនបានមានប្រសាសន៍ថា ការតម្រូវឲ្យមានអត្ដសញ្ញាប័ណ្ណគំរូថ្មី ដើម្បីធ្វើស្លាកលេខ ប័ណ្ណសម្គាល់យានយន្ដ ឬប័ណ្ណបើកបរនេះ ដោយសារតែមានការស្នើសុំពីអគ្គស្នងការដ្ឋាននគរបាលជាតិ ក្នុងការពិនិត្យលើការផ្ដល់សេវានេះឲ្យបានត្រឹមត្រូវ។ លោកបញ្ជាក់ថា ក្រសួងនឹងពិនិត្យឡើងវិញ ដើម្បីណែនាំដល់អ្នកមកសុំសេវា ត្រូវមានអត្ដសញ្ញាណប័ណ្ណគំរូថ្មី សម្រាប់បញ្ជាក់អំពីអត្ដសញ្ញាណរបស់អ្នកស្នើសុំឲ្យបានច្បាស់លាស់ក្នុងការសម្គាល់ម្ចាស់យានយន្ដ។
លោកឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានថ្លែងថា ការស្នើសុំដល់ក្រសួងសាធារណការ និងដឹកជញ្ជូនឲ្យពិនិត្យឡើងវិញនូវរាល់ ការផ្ដល់សេវាសាធារណៈទាំងអស់ពាក់ព័ន្ធនឹងវិស័យសាធារណការនេះ គឺដោយសារកាលពីឆ្នាំ២០១៨កន្លងមកនេះ សមត្ថកិច្ចនគរបាលបានធ្វើការចាប់ពិន័យយានយន្ដ បើកបរលើសល្បឿនកំណត់នៅតាមដងផ្លូវ និងបទល្មើសចរាចរណ៍ចំនួនជាង៧ពាន់គ្រឿង ក្នុងនោះសមត្ថកិច្ចរកឃើញម្ចាស់តែជាង២ពាន់គ្រឿងប៉ុណ្ណោះ ដោយសារតែម្ចាស់យានយន្ដប្រើប្រាស់ឯកសារមិនត្រឹមត្រូវក្នុងការធ្វើស្លាកលេខ ឬប័ណ្ណសម្គាល់យានយន្ដ។ លោកថា ដូច្នេះ ក្រសួងសាធារណការ ត្រូវតែពិនិត្យឡើងវិញ និងកំណត់យកអត្ដសញ្ញាណប័ណ្ណគំរូថ្មីពីអ្នកសុំសេវា ដោយឈប់យកលិខិតបញ្ជាក់ ឬប្រភេទលិខិតផ្សេងៗទៀត ដើម្បីចៀសវាង និងផ្ដល់ការលំបាកក្នុងការស្រាវជ្រាវរក អត្ដសញ្ញាណអ្នកបើកបរយានយន្ដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។