ព្រឹត្តិការណ៍កីឡាយានយន្តថ្មីមួយទៀតនឹងជួយបំផុសស្មារតីក្នុងការការពារបរិស្ថាន និងតំបន់ការពារដែនជម្រកសត្វព្រៃនានា
ក្រសួងបរិស្ថានសហការជាមួយសហព័ន្ធកីឡាយានយន្តកម្ពុជា ក្រុមហ៊ុន KARA និងក្រុមហ៊ុន TOTAL បានរៀបចំព្រឹត្តិការណ៍កីឡាប្រណាំងយានយន្តឆ្លងកាត់ ឧបស័គ្គថ្មីមួយទៀត ដោយ ឆ្លងកាត់ដែនជម្រកសត្វព្រៃ «ព្រៃឡង់» និងតំបន់ការពារជម្រកសត្វព្រៃមួយចំនួនទៀត ដែលគ្រោងនឹងធ្វើឡើង នាថ្ងៃទី១៧ ដល់ថ្ងៃទី២០ ខែឧសភា ឆ្នាំ២០១៩។ នេះបើតាមការប្រកាស ឱ្យដឹងរួមគ្នា នៅក្នុងសន្និសីទសារព័ត៌មាន កាលពីល្ងាចថ្ងៃទី០៦ ខែឧសភា ឆ្នាំ២០១៩ នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយអញ្ជើញចូលរួមពីលោក ពៅ តិចឡេង អគ្គនាយកក្រុមហ៊ុន KARA, លោក Asif IQBAL អគ្គនាយកក្រុមហ៊ុន TOTAL ប្រចាំកម្ពុជា និងក្រុមកីឡាករជាតិ-អន្តរជាតិជាច្រើននាក់ទៀត។
ឯកឧត្តម នេត្រ ភក្ត្រា រដ្ឋលេខាធិការ ក្រសួងបរិស្ថានគូសបញ្ជាក់ថា ព្រឹត្តិការណ៍នេះ គឺជាផ្នែកមួយ ដើម្បីទាក់ទាញអារម្មណ៍របស់សាធារណជនឱ្យចូលរួមក្នុងស្មារតី ថែរក្សាការពារបរិស្ថាន និងធនធានធម្មជាតិ ពិសេសការទប់ស្កាត់ការកាប់បំផ្លាញធនធានធម្មជាតិ តាមរយៈការប្រណាំកីឡាយានយន្តនៅតំបន់ដែនជម្រកសត្វព្រៃ ព្រៃឡង់ តំបន់ការពារជម្រកសត្វ ព្រៃមួយចំនួនទៀត ដូចជា ដែនជម្រកសត្វព្រៃ បឹងពែ ដែនជម្រក សត្វព្រៃ ព្រៃព្រះរកា នៅ ខេត្តព្រះវិហារ ហើយពេលដែលធ្វើដំណើរទៅដល់ខេត្តសៀមរាប ក្រុមកីឡាករនឹងត្រូវ ឆ្លង កាត់តំបន់ឧទ្យានជាតិភ្នំគូលែន និងតំបន់ការពារធម្មជាតិជាច្រើនទៀត។
លោក ហូ សិទ្ធិគុណ អនុប្រធានសហព័ន្ធកីឡាយានយន្តកម្ពុជាបានឱ្យដឹងដែរថា កីឡាប្រណាំងយានយន្តឆ្លងកាត់ឧបសគ្គ ក្នុងដែនជម្រកសត្វព្រៃ «ព្រៃឡង់» នេះ ធ្វើឡើងក្រោមប្រធានបទ រួមគ្នាថែរក្សាបរិស្ថាន និងធនធានធម្មជាតិ ដោយគ្រោងនឹងឆ្លងកាត់ខេត្តកំពង់ធំ ខេត្តព្រះវិហារ និងខេត្តសៀមរាប ពិសេសនឹងឆ្លងកាត់តំបន់ការពារដែនជម្រកសត្វព្រៃ «ព្រៃឡង់»។ លោកបន្តថា យានយន្តដែលចូលរួមក្នុងព្រឹត្តិការណ៍ អន្តរជាតិនេះ មានដូចជា ក្រុមម៉ូតូប្រណាំងចំនួន២០គ្រឿង និងក្រុមរថយន្តមាន២១គ្រឿង ក្នុងនោះមានរថយន្ត ប្រណាំងរបស់ក្រុមកីឡាករជាតិចំនួន១៥គ្រឿង និងរថយន្តប្រណាំងរបស់ក្រុមកីឡាករអន្តរ ជាតិចំនួន៤គ្រឿង និងរថយន្តជំនួយជួសជុលចំនួន២គ្រឿង។ ការប្រកួតនេះមានចម្ងាយផ្លូវ ទាំងផ្លូវរាប និងផ្លូវឧបសគ្គប្រមាណ ៦២៤គីឡូម៉ែត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។