ក្រុមសិល្បៈបុរាណកម្ពុជា គ្រោងរៀបចំបុណ្យបេតេភណ្ឌដើម្បីអបអរបីរួមគ្នា

ព្រហស្បតិ៍, 15 មីនា 2018 8:52 ព្រឹក

1,291

កាលពីពេលថ្មីៗនេះ មានការរៀបចំកម្មវិធីសន្និសិទ្ធសារព័ត៌មានមួយស្តីអំពីបុណ្យបេតេភណ្ឌ ក្នុងនោះលោក ជុំ វុឌ្ឍី ប្រធានមន្ទីរវប្បធម៌ និងវិចិត្រសិល្បៈរាជធានីភ្នំពេញបានបញ្ជាក់ប្រាប់ក្រុមអ្នកសារព័ត៌ថា ពិធី បុណ្យបេតិកភណ្ឌ នឹងប្រារព្ធធ្វើឡើងដែលមានរយៈពេល៣ថ្ងៃ គឺចាប់ពីថ្ងៃទី១៤-១៥-១៦ ខែតុលា ឆ្នាំ២០១៦ ដើម្បីអបអរសាទរខួបទី១៣ឆ្នាំ របាំព្រះរាជទ្រព្យនិងខួបទី១១ឆ្នាំ នៃល្ខោនស្រមោលស្បែកធំ ចូលជាសម្បត្តិបេតិកភណ្ឌអរូបី នៃមនុស្សជាតិ ដោយអង្គការ UNESCO។ និងមានការចូលរួមពីមន្ដ្រីពាក់ព័ន្ធ សិល្បករ-សិល្បការិនី លោកគ្រូ អ្នកគ្រូ ផ្នែកសិល្បៈជាច្រើននាក់

លោក ប្រធានមន្ទីរវប្បធម៌ និងវិចិត្រសិល្បៈ រាជធានីភ្នំពេញ ក៏បានបញ្ជាក់ដែរថា «ពិធីសំពះគ្រូនេះត្រូវបានធ្វើឡើង ដើម្បីសុំខមាលទោស គ្រូតូច គ្រូធំ របស់គ្រូសិល្បៈទាំងអស់ ដែលបានពលីជីវិត និងបួងសួង សម្រាបពិធីបុណ្យបេតិកភណ្ឌ នាថ្ងៃទី១៤-១៥-១៦ ខែតុលា ខាងមុខនេះផងដែរ»។

លោក ជុំ វុឌ្ឍី បន្ដថា ដើម្បីលើកតម្កើងការផ្សព្វផ្សាយ នូវកេរមតកវប្បធម៌ ដ៏មានតម្លៃរបស់ជាតិខ្មែរ ឲ្យកាន់តែមានភាពល្បីល្បាញលើឆាកជាតិ អន្ដរជាតិ និងជំរុញយុវជនខ្មែរ ស្វែងយល់ឲ្យកាន់តែច្បាស់ អំពីទម្រង់សិល្បៈនីមួយៗ តាមរយៈសិក្ខាសាលាធ្វើបទបង្ហាញ ព្រមទាំងទស្សនាការសម្ដែង ជាពិសេសដើម្បី ចូលរួមអបអរសាទរព្រះរាជ ពិធីគ្រងរាជ្យសម្បត្តិព្រះបាទ សម្ដេចព្រះបរមនាថ នរោត្តម សីហមុនី ហើយថវិកាដែលបានមកពីការលក់សំបុត្រ ក្នុងពិធីនេះ បរិច្ចាគដល់មន្ទីរពេទ្យកុមារអង្គរ ខេត្តសៀមរាប ដែលកំពុងជួបការខ្វះខាត។

សូមជំរាបថា កម្មវិធីនេះ ត្រូវរៀបចំឡើងដោយការសហការរវាង មន្ទីរវប្បធម៌ និងវិចិត្រសិល្បៈរាជធានីភ្នំពេញ សមាគមសិល្បៈមរតកហ្វ៊ូណន សមាគមសិល្បៈគោកធ្លក សាលាសិល្បៈចំប៉ី សមាគមស៊ីក្លូ មន្ទីរពេទ្យកុមារអង្គរ និងយុវជននិស្សិតស្ម័គ្រចិត្ត១៥០នាក់ ព្រមទាំងស្ថាប័នជាច្រើនទៀត នាថ្ងៃទី១៤-១៥-១៦ ខែតុលាខាងមុខនេះ៕