បវរកញ្ញា Miss Global Cambodia ចូលរួមសម្អាតបរិស្ថាននៅឆ្នេរអូត្រេះ
កាលពីចុងសប្តាហ៍នេះ បវរកញ្ញាឯកកម្ពុជា (Miss Global Cambodia) បានចូលរួមសម្អាតបរិស្ថាននៅឆ្នេរអូត្រេះ ដើម្បីចូលរួមលើកកម្ពស់អនាម័យ បរិស្ថាន និងសោភណភាពនៅតាមតំបន់ឆ្នេរក្នុងខេត្ដព្រះសីហនុ។
យោងតាមអ្នករៀបចំកម្មវិធី គោលបំណងសំខាន់របស់ក្រុមការងារបវរកញ្ញាឯកកម្ពុជា(Miss Global Cambodia) គឺដើម្បីសិក្សាឈ្វេងយល់ ផ្សព្វផ្សាយពីវប្បធម៌ ទេសចរណ៍ សកម្មភាពមនុស្សធម៌ សប្បុរសធម៌ ពិសេសការចូលរួមសម្អាតបរិស្ថាននៅតាមបណ្តោយឆ្នេរអូត្រេះ ដើម្បីបង្ហាញឱ្យពិភពលោក បានស្គាល់ពីសក្តានុពលតំបន់ឆ្នេរសមុទ្រកម្ពុជា ពិសេសឆ្នេរសមុទ្រខេត្តព្រះសីហនុ។
ជាមួយគ្នានេះដែរ លោកស្រី ហៀក ហ៊ីមុល្លី អភិបាលរងខេត្ដព្រះសីហនុ បានជំរុញដល់បងប្អូនប្រជាពលរដ្ឋ ក៏ដូចជាភ្ញៀវទេសចរ ចូលរួមថែរក្សាសោភណភាព បរិស្ថាននៅតាមតំបន់ឆ្នេរ ទីប្រជុំ ក៏ដូច ទីសាធារណ:ជាប្រចាំ ដើម្បីប្រែក្លាយផ្នត់គំនិតប្រជាពលរដ្ឋ ឱ្យចេះស្រឡាញ់បរិស្ថាន ដោយមិនបោះចោលសំរាមនៅពាសវាល ពាសកាល។ ទន្ទឹមនេះ ត្រូវចេះវេចខ្ចប់សំរាមឱ្យបានត្រឹមត្រូវ យកទៅដាក់ក្នុងធុងសំរាម ដើម្បីប្រែក្លាយឆ្នេរសមុទ្ររបស់យើង មានភាពស្រស់ស្អាត បៃតង និងភាពទាក់ទាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។