ឥណ្ឌា៖ កុមារប្រមាណ ១៥ម៉ឺននាក់ បាត់បង់ជីវិតឪពុកម្តាយ ដោយសារការរាតត្បាតនៃជំងឺកូវីដ-១៩
ញូដេលី៖ គណៈកម្មការជាតិឥណ្ឌាទទួលបន្ទុកកិច្ចការពារសិទ្ធិកុមារបញ្ជាក់ថា កុមារប្រមាណ ១៥ម៉ឺននាក់នៅក្នុងប្រទេសឥណ្ឌា បានបាត់បង់ឪពុកម្តាយម្នាក់ ឬទាំងពីរនាក់តែម្តង ក្នុងអំឡុងពេលជំងឺរាតត្បាត COVID-19។
គណៈកម្មការនេះបន្តថា ចាប់តាំងពីថ្ងៃទី ០១ ខែមេសា ឆ្នាំ២០២០មក កុមាររហូតដល់ ១៤ម៉ឺន៧ពាន់៤៩២នាក់នៅឥណ្ឌាបានបាត់បង់ឪពុកម្តាយម្នាក់ ឬទាំងពីរនាក់តែម្តង ដោយសារតែមេរោគដ៏កាចសាហាវមួយ និងពីព្រោះតែមូលហេតុផ្សេងទៀត។ ការវិភាគទិន្នន័យបានបង្ហាញថា កុមាររហូតដល់ ១៣ម៉ឺន៦ពាន់៩១០នាក់បានបាត់បង់ឪពុកម្តាយម្នាក់ ខណៈ១ម៉ឺន៩៤នាក់នាក់បានក្លាយជាក្មេងកំព្រា និងកុមារចំនួន ៤៨៨នាក់ទៀតត្រូវបានគេបោះបង់ចោល។
ចំនួនកុមារអតិបរមាគឺនៅក្នុងក្រុមអាយុ 8-13ឆ្នាំមានចំនួន ៥ម៉ឺន៩ពាន់១០នាក់បន្ទាប់មកកុមារនៅក្នុងក្រុមអាយុ 14-15 ឆ្នាំមានចំនួន ២ម៉ឺន២ពាន់៧៦៣នាក់និងក្នុងក្រុមអាយុ 16-18 ឆ្នាំមានចំនួន ២ម៉ឺន២ពាន់៦២៦នាក់ និងពី 4 ទៅ 7 ឆ្នាំមានចំនួន ២ម៉ឺន៦ពាន់៨០នាល់ នេះបើយោងតាមគណៈកម្មការខាងលើ។
គណៈកម្មការនេះបានពន្យល់ថា ចំនួនអតិបរមានៃកុមារដែលរងផលប៉ះពាល់នោះ គឺមកពីរដ្ឋ Odisha មានចំនួន២ម៉ឺន៤ពាន់៤០៥នាក់ បន្ទាប់មកគឺរដ្ឋ Maharashtra មានចំនួន ១ម៉ឺន៩ពាន់៦២៣នាក់ រដ្ឋ Gujarat មានចំនួន ១ម៉ឺន៤ពាន់៧៧០នាក់ រដ្ឋ Tamil Nadu មានចំនួន ១ម៉ឺន១ពាន់១៤នាក់ រដ្ឋ Uttar Pradesh មានចំនួន ៩ពាន់២៤៧នាក់ រដ្ឋ Andhra Pradesh មានចំនួន ៨ពាន់៧៦០នាក់ រដ្ឋ Madhya Pradesh មានចំនួន៧ពាន់៣៤០នាក់ រដ្ឋ West Bengal មានចំនួន ៦ពាន់៨៣៥នាក់ រដ្ឋ Delhi មានចំនួន ៦ពាន់៦២៩នាក់ និង រដ្ឋ Rajasthan មានចំនួន ៦ពាន់៨២៧នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។