កុំប្រហែស! បញ្ឆេះរថយន្តទុកកូនតូចពីរនាក់ឲ្យដេក ចោរលួចរថយន្តជាប់ទាំងកូនតូចទៅជាមួយដែរ
រាជធានីភ្នំពេញ៖ សមត្ថកិច្ចទាំង១២ខណ្ឌ នៃក្រុងភ្នំពេញកាលពីយប់មិញនេះ បានបើកប្រតិបត្តិការជួយអន្តរាគមន៍ភ្លាមៗ ក្រោយពីមានករណីចោរលួចរថយន្ត ជាប់ទាំងក្មេងតូចពីរនាក់ដែលឪពុកម្តាយដាក់ឲ្យដេកនៅក្នុងរថយន្តនោះទៅជាមួយផង។
តែយ៉ាងណាក៏ដោយ ប្រតិបត្តិការនោះ សមត្ថកិច្ចបានរកឃើញរថយន្ត និងក្មេងតូចទាំងពីរនោះត្រឡប់មកវិញ ប៉ុន្តែក្រុមជនល្មើសបានរត់គេចខ្លួនអស់។
តាមក្រុមគ្រួសារសាច់ញាតិជនរងគ្រោះថា នៅមុនពេលកើតហេតុ ស្ត្រីជាម្ដាយមានឈ្មោះ ពៅ បុប្ផាអាយុ ៣៨ឆ្នាំ និងប្ដីឈ្មោះ ណុប ពិសី អាយុ ៣៨ ឆ្នាំ បានជិះរថយន្តរថយន្តម៉ាក ហាយលែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2S-4126 ពីផ្ទះមកលក់ដូរមានបុក ល្ហុងប្រហិតនៅផ្លូវ១៤៣ សង្កាត់អូរឡាំពិក ខណ្ឌចំការមន ។ ដោយឃើញកូន តូចអាយុពីរខែ និងបងម្នាក់ទៀតអាយុ១១ឆ្នាំងងុយដេក ក៏បញ្ឆេះរថយន្តទុកកូនឲ្យដេកនៅក្នុងនោះ។
មួយសន្ទុះក្រោយមក ក៏មានលោកចោរចំនួន២នាក់បានដើរក្រឡឹងរថយន្ត ២ ទៅ ៣ជុំ រួចធ្វើសកម្មភាពលួចរថយន្តទៅបាត់ ធ្វើឲ្យម្ដាយឪពុកភ័យស្លន់ស្លោ និងរាយការណ៍ទៅ សមត្ថកិច្ច ផ្អើលអាជ្ញាធរទាំង១២ខណ្ឌក្នុងរាជធានីភ្នំពេញ ដេញស្ទាក់ចាប់បានរថយន្តចំណុចក្បាលថ្នល់ តែជនសង្ស័យបានរត់គេចខ្លួនអស់។
បន្ទាប់ពីសមត្ថកិច្ចដេញស្ទាក់យករថយន្ត និងកូនៗតូចពីរនាក់បងប្អូនបានមកវិញ ក៏បាននាំយករថយន្តនិងជនរងគ្រោះ ទៅអធិការដ្ឋានគរបាលខណ្ឌចំការមនដើម្បីធ្វើការសាកសួរនិងធ្វើការស្រាវជ្រាវស្វែងរកក្រុមជនសង្ស័យយកមកផ្ដន្ទាទោសតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។