កម្ពុជាប្រកាសពីការរកឃើញករណីកូវីដ១៩ ចំនួន ១២ករណីថ្មីបន្ថែមទៀត ហើយសណ្ឋាគារ Great Duke នឹងត្រូវប្រើប្រាស់ជាមន្ទីរពេទ្យសម្រាប់ព្យាបាល
នៅព្រឹកថ្ងៃទី១៧ ខែមីនា ឆ្នាំ២០២០ ក្រសួងសុខាភិបាលកម្ពុជា បានប្រកាសថា ខ្លួនបានរកឃើញវិជ្ជមានជំងឺកូវីដ១៩ ទៅលើមនុស្ស១២នាក់បន្ថែមទៀត ដែលធ្វើឲ្យកម្ពុជាមានករណីកូវីដសរុបចំនួន ២៤ករណីហើយ។
តាមការបញ្ជាក់របស់ក្រសួងសុខាភិបាល ករណីកូវីដ១២ករណីថ្មីនេះ គឺ ២ករណីនៅខេត្តបន្ទាយមានជ័យ កើតទៅលើជនជាតិខ្មែរឥស្លាម និងបុរសជនជាតិខ្មែរត្រឡប់មកពីប្រទេសថៃ, រាជធានីភ្នំពេញ២ករណី កើតទៅបុរសខ្មែរឥស្លាមនៅព្រែកប្រា, ខេត្តកំពង់ឆ្នាំង២ករណី កើតទៅបុរសខ្មែរឥស្លាម២នាក់, បាត់ដំបង ៤ករណី កើតទៅលើបុរសខ្មែរឥស្លាម, ខេត្តកំពត ១ករណី កើតទៅលើបុរសខ្មែរឥស្លាម និង ខេត្តត្បូងឃ្មុំ ១ករណី កើតទៅលើបុរសខ្មែរឥស្លាម។
បុរសជនជាតិខ្មែរឥស្លាមទាំង១១នាក់ខាងលើ គឺអ្នកក្នុងចំណោមអ្នកដែលបានវិលត្រឡប់មកពីការចូលរួមពិធីសាសនានៅប្រទេសម៉ាឡេស៊ីចំនួន ៧៩នាក់។
យ៉ាងណាក៏ដោយ ចំពោះមុខស្ថានភាពនេះ ក្រសួងសុខាភិបាលបានសម្រេចប្រើប្រាស់សណ្ឋាគារ Great DUKE (អតីតសណ្ឋាការអាំងទែកុងទីណង់តាល់) ជាមន្ទីរពេទ្យសម្រាប់ពិនិត្យ ថែទាំ និងព្យាបាលអ្នកជំងឺកូវីដ១៩។ ហើយជាមួយគ្នានេះ ក្រសួងក៏ស្នើដល់ប្រជាពលរដ្ឋទាំងអស់ សូមរក្សាភាពនឹងនរក្នុងចិត្ត ដោយកុំមានការភ័យខ្លាច ហើយជឿទុកចិត្តលើវិធានការប្រយុទ្ធនឹងជំងឺកូវីដ១៩ របស់រាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។