រថយន្តបុកជាមួយម៉ូតូ ស្លាប់ម្នាក់ របួសធ្ងន់២នាក់ នៅស្រុកក្រគរ
ខេត្តពោធិ៍សាត់៖ យ៉ាងហោចណាស់បុរសម្នាក់ បានស្លាប់ភ្លាមៗ និងអ្នករួមដំណើរ២នាក់ទៀត រងរបួសធ្ងន់ ក្នុងករណីគ្រោះថ្នាក់ចរាចរណ៍មួយ រវាងរថយន្តបុកជាមួយម៉ូតូពេញទំហឹង កាលពីល្ងាចថ្ងៃទី១០ ខែមិថុនា ឆ្នាំ២០២០ លើកំណាត់ផ្លូវជាតិលេខ៥ ក្នុងភូមិសាន្តស ឃុំអន្សាចំបក់ ស្រុកក្រគរ ខេត្តពោធិ៍សាត់។
សាក្សីនិយាយថា មុនពេលកើតហេតុ គេឃើញជនរងគ្រោះទាំង៣នាក់ ជិះម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខ 1C 7468 ទិសដៅពីលិចទៅកើត លុះមកដល់ចំណុចកើតហេតុ ម៉ូតូបានធ្លាក់ក្រឡុករួចវ៉េចង្កូតទៅខាងឆ្វេង ចូលក្រោមឡានដឹកដី១គ្រឿង ម៉ាក SCANIA ពណ៌ស ពាក់ស្លាកលេខ សៀមរាប 3A-3047 ទិសដៅពីកើតទៅលិច បណ្តាលឲ្យភាគីខាងម៉ូតូ មានស្លាប់ និងរងរបួសធ្ងន់តែម្តង។
ជនរងគ្រោះទី១.ឈ្មោះ ណាត ឆក ភេទប្រុស អាយុ១៧ឆ្នាំ ជាអ្នកបើកបរ (ស្លាប់), ទី២.ឈ្មោះ ណាត ញ៉ញ់ ភេទស្រី អាយុ១៥ឆ្នាំ (រងរបួសធ្ងន់) និងទី៣.ឈ្មោះ អឿន នាច ភេទស្រី អាយុ១៨ឆ្នាំ (រងរបួសធ្ងន់)។ ចំណែកអ្នកបើកបររថយន្ត បានរត់គេចខ្លួនបាត់។
ក្រោយពេលកើតហេតុ សមត្ថកិច្ចចុះជួយអន្តរាគមន៍ និងបញ្ជូនជូនជនរងគ្រោះទៅសង្គ្រោះបន្ទាន់នៅមន្ទីរពេទ្យ។ ចំណែកសពបានប្រគល់ជូនសាច់ញាតិយកទៅធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។