ករណីរន្ធត់! យុវជនម្នាក់ ធ្លាក់ពីលើម៉ូតូ ត្រូវរថយន្តកិនបែកក្បាល ស្លាប់នៅនឹងកន្លែង
ខេត្តកោះកុង៖ ករណីដ៏រន្ធត់មួយ បានកើតឡើងនៅវេលាម៉ោង១០ និង៣០នាទីយប់ ថ្ងៃទី១០ ខែមិថុនា ឆ្នាំ២០២០ ដោយសារយុវជនម្នាក់ បានធ្លាក់ពីលើម៉ូតូ ហើយត្រូវរថយន្តកិនបែកក្បាល បណ្តាលឲ្យស្លាប់នៅនឹងកន្លែង
ក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
បើតាមរបាយការណ៍ពីសមត្តកិច្ច បានឲ្យដឹងថា គេឃើញម៉ូតូ១គ្រឿង ម៉ាកDream C125 ពណ៌ខ្មៅ ពាក់ស្លាកលេខ កោះកុង 1A-5977 ជិះគ្នា២នាក់ លុះមកដល់ចំណុចខាងលើ ចុះចំណោទហើយធ្លាក់ចិញ្ចើមផ្លូវ ហើយបើកឡើងមកវិញ ស្រាប់តែអ្នកជិះពីក្រោយធ្លាក់ពីលើម៉ូតូ ត្រូវរថយន្ត១គ្រឿង (Hyundai) ពាក់ស្លាកលេខ ព្រះសីហនុ 3A-6163 ទិសដៅស្របគ្នា កិនពីលើជនរងគ្រោះ បណ្តាលឲ្យបែកក្បាលស្លាប់នៅនឹងកន្លែងតែម្តង។
ជនរងគ្រោះឈ្មោះ គៀន ភារុន ភេទប្រុស អាយុ១៦ឆ្នាំ មានទីលំនៅភូមិចាំយាម ឃុំប៉ាក់ខ្លង ស្រុកមណ្ឌលសីមា។ ចំណែកអ្នកបើកបររថយន្តឈ្មោះ សៀន ស្រ៊ាង ភេទប្រុស អាយុ៣១ឆ្នាំ មានទីលំនៅភូមិសូទៃ ឃុំរួង ស្រុកមេមត់ ខេត្តត្បូងឃ្មុំ។
ក្រោយពេលកើតហេតុ សមត្ថកិច្ចជំនាញ បានចុះវាស់វែង និងបានប្រគល់សពជូនសាច់ញាតិ យកទៅធ្វើបុណ្យតាមប្រពៃណី។ រីឯអ្នកបើកបររថយន្ត និងម៉ូតូ បាននាំយកទៅអធិការដ្ឋាននគរបាលស្រុកមណ្ឌលសីមា រងចាំដោះស្រាយនិតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។