សត្វដំរីអាស៊ីមួយហ្វូង ត្រូវបានប្រទះឃើញក្នុងដែនជម្រកសត្វព្រៃស្រែពក ខេត្តមណ្ឌលគីរី
ខេត្តមណ្ឌលគីរី៖ ក្រុមអ្នកជំនាញសត្វព្រៃរបស់អង្គការ WWF បានប្រទះឃើញសត្វដំរីអាស៊ីមួយហ្វូង ដែលមានចំនួន៦ក្បាល ខណៈដែលពួកវាកំពុងតែស្វែងរកចំណីយ៉ាងសុខសាន្ត នៅក្នុងទីជម្រកធម្មជាតិ នៃដែនជម្រកសត្វព្រៃស្រែពក ក្នុងខេត្តមណ្ឌលគីរី ដែលជាតំបន់ការពារ ស្ថិតក្រោមការគ្រប់គ្រងរបស់មន្ទីរបរិស្ថាន នៃក្រសួងបរិស្ថាន។
អង្គការនេះ បានបញ្ជាក់ថា តែដោយសារភាពវៃឆ្លាត និងមានញាណដឹងតាមរយៈក្លិនថា មានវត្តមានមនុស្ស សត្វដំរីព្រៃទាំងនេះ បានផ្អើលហើយក៏បានត្រលប់ក្រោយចូលទីជម្រកសុវត្ថិភាពវិញ។ ក្រុមអ្នកស្រាវជ្រាវ និងតាមដានសត្វព្រៃរបស់យើងអាចផ្តិតយកនូវវីដេអូខ្លីមួយនេះបាន ដោយមានការព្យាយាមនិងអត់ធ្មត់ខ្លាំងព្រោះត្រូវសម្ងំលើដើមឈើក្នុងការថតដើម្បីសុវត្ថិភាពផ្ទាល់ខ្លួន។
សូមជម្រាបថា សត្វដំរីអាស៊ី ត្រូវបានចាត់ថ្នាក់ក្នុងបញ្ជីក្រហមរបស់អង្គការ IUCN ថាជាប្រភេទសត្វកំពុងរងគ្រោះថ្នាក់ជិតផុតពូជ។ នៅកម្ពុជា សត្វដំរីអាសុីកំពុងទទួលរងការគំរាមកំហែងដោយការបរបាញ់ ការដាក់អន្ទាក់ ការជួញដូរភ្លុកនិងស្បែក និងការបាត់បង់ទីជម្រក៕
https://www.facebook.com/314699302002531/videos/580454329556621/
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។