ចាប់ខ្លួនជនជាតិឡាវ ២នាក់ ដកហូតគ្រឿងញៀនជិត ៦គីឡូក្រាម នៅខេត្តស្ទឹងត្រែង
ខេត្តស្ទឹងត្រែង៖ យ៉ាងហោចណាស់គ្រឿងញៀនមេតំហ្វេតាមីនចំនួន ៦កញ្ចប់ធំ មានទម្ងន់ជិត៦គីឡូក្រាម ត្រូវបានសមត្ថកិច្ចរឹបអូសបានកាលពីនៅថ្ងៃទី១១ កក្កដា ចុងសប្តាហ៌នេះ នៅចំណុចផ្លូវលំ ស្ពានអូរទី២ ស្ថិតក្នុងភូមិអូរស្វាយ ខេត្តស្ទឹងត្រែង។
មន្ត្រីជំនាញ បានឲ្យដឹងថា ប្រតិបត្តិការបង្ក្រាបគ្រឿងញៀននេះ សមត្ថកិច្ច បានឃាត់ខ្លួនជនសង្ស័យចំនួន ២នាក់ ជាជនជាតិឡាវ គឺឈ្មោះ ស៊ូ បាន់ ភេទប្រុស អាយុ៣២ឆ្នាំ មុខរបរជាគ្រូបង្រៀន រស់នៅភូមិណាសែងខាំ ស្រុកសៃ ខេត្តឧត្តមសៃ និងឈ្មោះ ចាន់ ឌី ភេទប្រុស អាយុ៣១ឆ្នាំ មុខរបរធ្វើចម្ការ រស់នៅភូមិ ភៀងញ៉ ស្រុកហ៊ុន ខេត្តឧត្តមសៃ។ ចំណែកគ្រឿងញៀនដែលដកហូតបាន ជាប្រភេទមេតំហ្វេតាមីនចំនួន ៥៩៨៦.២៩ក្រាម។
បច្ចុប្បន្នជនសង្ស័យ ត្រូវបានសមត្តកិច្ច សាកសួរនិងកសាងសំណុំរឿង ដើម្បីបញ្ជូនទៅតុលាការ ចាត់ការបន្តតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។