អាជ្ញាធរខេត្ដសៀមរាប គ្រោងបង្កើតព្រឹត្ដិការណ៍សាសនា និងព្រឹត្ដិការណ៍កីឡា នៅថ្ងៃឈប់សម្រាកសងថ្ងៃចូលឆ្នាំ
ខេត្ដសៀមរាប៖ ឯកឧត្តម ទៀ សីហា អភិបាលខេត្តសៀមរាប ក្នុងកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅអនុវត្ដបន្ដឆមាសទី២ឆ្នាំ២០២០ បានមានប្រសាសន៍ថា រាជរដ្ឋាភិបាលកម្ពុជា បានអនុញ្ញាតឲ្យមន្ដ្រីរាជការនិយោជិតកម្មករឈប់សម្រាករយៈពេល៥ថ្ងៃ ចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ ខាងមុខនេះ ដើម្បីសងថ្ងៃឈប់សម្រាកចូលឆ្នាំថ្មីប្រពៃខ្មែរ ដែលរដ្ឋាភិបាលបានហាមប្រាមមិនឲ្យមានការជួបជុំគ្នាដោយសារបញ្ហជំងឺកូវីដ១៩ កាលពីខែមេសាឆ្នាំ២០២០កន្លងមក។
ដូច្នេះក្នុងថ្ងៃសងថ្ងៃឈប់សម្រាកនេះ រដ្ឋបាលខេត្ត គ្រោងដាក់ពាក្យស្នើសុំទៅក្រសួងសុខាភិបាល មន្ទីរសុខាភិបាល ដើម្បីស្នើរសុំរៀបចំកម្មវិធីសាសនា និងបង្កើតព្រឹត្ដិការណ៍កីឡាផ្សេងៗ នៅក្នុងក្រុងសៀមរាបរយៈពេល២ថ្ងៃ ក្នុងចំណោម៥ថ្ងៃនៅខែសីហាខាងមុខនេះ ដើម្បីធ្វើឲ្យប្រជាពលរដ្ឋ និងភ្ញៀវទេសចរទស្សនាកំសាន្ដ ហើយតាមរយៈព្រឹត្ដិការណ៍នេះ ប្រតិបត្តិករទេសចរណ៍ នឹងត្រូវឲ្យបើកដំណើរការឡើងវិញដែរ ដូចជាផ្ទះសំណាក់ សណ្ឋាគារ និង ភោជនីយដ្ឋាន ដើម្បីទទួលភ្ញៀវទេសចរណ៍ ។
ឯកឧត្ដមអភិបាលខេត្ដ បានបញ្ជាក់ថា ក្នុងឆមាសទី១ ឆ្នាំ២០២០នេះ ខេត្តសៀមរាប ទទួលបានភ្ញៀវទេសចរអន្តរជាតិ ចូលមកទស្សនាចំនួនត្រឹមតែ ៣៨៧.៨៤០នាក់ប៉ុណ្ណោះ ថយចុះរហូតដល់៦៨,៨៣ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ២០១៩ ដែលមានសរុបចំនួន ១.២៣៣.៨៤០នាក់ ហើយការធ្លាក់ចុះនេះ គឺបានចាប់ផ្ដើមពីអំឡុងពេល នៃការបិទជើងហោះហើរចូលមកកាន់ខេត្តសៀមរាបនាចុងខែមីនា ឆ្នាំ២០២០នេះ ដែលធ្វើឱ្យបងប្អូនជាប្រតិបត្តិករទេសចរណ៍ទាំងអស់ក្នុងខេត្តសៀមរាប បានជួបប្រទះនូវបញ្ហាប្រឈមជាខ្លាំងក្នុងអាជីវកម្មរបស់ខ្លួន ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។