ដំណាំផ្កាចន្ធូ អាចរកប្រាក់ចំណេញជាង ៨លានរៀល ក្នុង១ឆ្នាំ
ខេត្តត្បូងឃ្មុំ៖ ការដាំដុះដំណាំផ្កាចន្ធូ របស់កសិករឈ្មោះ ហ៊ឹង ប៊ុនហេង នៅភូមិអូររំចេក ឃុំត្រពាំងជង ស្រុកបាកាន ដែលបានដាំផ្កាចន្ធូ លើផ្ទៃដីតូច ដែលមានទំហំតែកន្លះហិកតាតែប៉ុណ្ណោះ អាចរកប្រាក់ចំណេញជាង ៨លានរៀល ក្នុង១ឆ្នាំ។ នេះបើតាមការបញ្ជាក់របស់ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
បើតាមលោក ហ៊ឹង ប៊ុនហេង ជាម្ចាស់ចំការដំណាំផ្កាចន្ធូ បានរៀបរាប់ថា ដំណាំផ្កាចន្ធូ បានដាំរយះពេលមួយឆ្នាំ មកហើយ ចំណាយថវិកាទិញពូជ ជី អង្កាម និងប្រេងបូមទឹក អស់ថវិកាសរុប ៨ ៦៨០ ០០០រៀល។ ចំពោះការប្រមូលផលវិញ គឺបានធ្វើឡើង ១សប្តាហ៍ម្តង ដែលទទួលបានប្រាក់ចំណូល ៤០០ ០០០រៀល ទៅ ៥០០ ០០០រៀល រៀងរាល់ថ្ងៃសីល។
លោក បានបញ្ជាក់ថា ក្នុងរយៈពេល០១ខែ អាចកាត់ផ្កាប្រមូលផលបានចំនួន ០៤លើក (០៤ថ្ងៃសីល៍ក្នុងមួយខែ) ដោយដឹកយកទៅលក់ នៅក្រៅខេត្ត ដូចជា ខេត្តបាត់ដំបង បន្ទាយមានជ័យ សៀមរាប និងទីក្រុងភ្នំពេញ និងពេលខ្លះឈ្មួញមកទទួលទិញដល់ផ្ទះ ដោយ០១ឆ្នាំ ចំណូលពីការលក់បានចំនួន ១៧ ២០០ ០០០ រៀល ចំណេញសរុបបានចំនួន ៨ ៥២០ ០០០រៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។