បើទោះជាមានការបង្រ្កាប តែទីតាំងល្បែងទឹកភ្លៀងនៅខាងក្រោយផ្សារភូពុយក្រុងបាត់ដំបងនៅតែដំណើរការ
ល្បែងទឹកភ្លៀងនៅខាងក្រោយផ្សារភូពុយក្នុងក្រុងបាត់ដំបងនៅតែត្រូវគេបើកលេងជាធម្មតា បើទោះជាកាលពីពេលថ្មីៗនេះអាជ្ញាធរបានចុះធ្វើការបង្រ្កាបទីតាំងនោះក៏ដោយ ក៏វានៅតែបើកដំណើរការឡើងវិញ ដែលហាក់បីដូចជាការបង្រ្កាបកាលពីដើមខែកក្កដានោះគ្រាន់តែល្អមើល បំភ័ន្តភ្នែកសាធារណជនប៉ុណ្ណោះ។
យោងតាមសេចក្តីរាយការណ៍ ទីតាំងល្បែងភ្នាល់ទឹកភ្លៀងស្ថិតនៅខាងក្រោយផ្សារភូពុយនេះ នៅតែមានលេង ដោយមានការលេងភ្នាល់រហូតដល់រាប់លានរៀលទៀតផង ដោយមានមេកាម្នាក់ដែលគេស្គាល់ឈ្មោះថា ឆ្នោតជុំ ជាមេកាមើលការខុសត្រូវ។
ចំពោះករណីនេះ យើងមិនទាន់អាចទាក់ទងសុំការបំភ្លឺពីលោក ឆាង វណ្ណឆៃ អធិការនគរបាលក្រុងបាត់ដំបង ក៏ដូចជាលោក អ៊ុច សុខុន អធិការនគរបាលខេត្តបាត់ដំបងបានទេនៅថ្ងៃនេះ។
យ៉ាងណាក៏ដោយ ប្រជាពលរដ្ឋបានសម្តែងក្តីរំពឹងថា សមត្ថកិច្ចខេត្តបាត់ដំបងនឹងចុះបង្រ្កាបទីតាំងនេះមិនឲ្យដំណើរការបានតទៅទៀត ព្រោះថា ល្បែងស៊ីសងទាំងនេះហើយដែលនាំឲ្យកើតជាអំពើចោរកម្មនៅមូលដ្ឋាន ដែលវាផ្ទុយផងដែរទៅនឹងគោលនយោបាយភូមិឃុំមានសុវត្ថិភាពដែលកំណត់ដោយរាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។