ថ្ងៃនេះ! កម្ពុជា ប្រកាសរកឃើញករណីកូវីដ១៩ថ្មី ១នាក់ ខណៈមានអ្នកជាសះស្បើយ ២នាក់
ភ្នំពេញ៖ ក្រសួងសុខាភិបាលបានឲ្យដឹងនៅក្នុងសេចក្តីជូនដំណឹងរបស់ខ្លួននៅថ្ងៃនេះថា គេបានរកឃើញករណីវិជ្ជមានវីរុសកូវីដ១៩ មួយករណីថ្មី ទៅលើបុរសខ្មែរអាយុ២៨ឆ្នាំ ដែលបានធ្វើដំណើរមកពីប្រទេសរុស្ស៊ី។
បុរសរូបនេះបានបន្តជើងហោះហើរនៅប្រទេសម៉ាឡេស៊ី និងបានមកដល់កម្ពុជានៅថ្ងៃទី១៩ ខែកក្កដា ឆ្នាំ២០២០ វេលាម៉ោង ១២ និង៥៥នាទីរសៀល។
ជាមួយគ្នានេះ ថ្ងៃនេះក៏មានករណីជាសះស្បើយចំនួន២ករណីដែរ គឺជាបុរសជនជាតិខ្មែរ មានអាស័យដ្ឋាននៅស្រុកព្រៃនប់ ខេត្តព្រះសីហនុ ដែលជាអ្នកដំណើរមកពីប្រទេសឥណ្ឌូនេស៊ី, ពួកគេបានចាកចេញពីមន្ទីរពេទ្យមិត្តភាពខ្មែរ-សូវៀត។
សូមបញ្ជាក់ថា បើគិតមកទល់នឹងថ្ងៃទី២៣ ខែកក្កដា ឆ្នាំ២០២០នេះ កម្ពុជាមានករណីជំងឺកូវីដ១៩សរុបចំនួន ១៩៨នាក់ ក្នុងនោះអ្នកជាសះស្បើយចំនួន ១៤២នាក់ និងអ្នកកំពុងសម្រាកព្យាបាលមានចំនួន ៥៤នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។