បណ្ដុំអាជីវកម្មដំណាំបន្លែ នៅខេត្តកំពង់ឆ្នាំង ធ្វើឲ្យកសិករមានជីវភាពប្រសើរឡើងជាលំដាប់
ខេត្តកំពង់ឆ្នាំង៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា ការរីកចម្រើនធំធាត់ពីមួយឆ្នាំទៅមួយឆ្នាំ របស់បណ្ដុំអាជីវកម្មដំណាំបន្លែ នៅភូមិត្រពាំងក្រពើ ឃុំទឹកហូត ស្រុករលាប្អៀរ ខេត្តកំពង់ឆ្នាំង បានធ្វើឲ្យសមាជិកបណ្តុំ កាន់តែមានជីវភាពប្រសើរឡើងជាលំដាប់។
សូមបញ្ជាក់ថា បណ្ដុំអាជីវកម្មដំណាំបន្លែនៅភូមិត្រពាំងក្រពើ ទទួលបានការបំពាក់បំប៉ន និងជួយគាំទ្របច្ចេកទេស ហេដ្ឋារចនាសម្ព័ន្ធ និងធនធានថវិកាមួយចំនួន របស់គម្រោងកម្មវិធីបច្ចេកទេសកសិកម្មថ្មីដែលធន់និងការបម្រួលអាកាសធាតុ ដែលហៅកាត់ថា ASPIRE ។
ជាលទ្ធផលដែលទទួលបានគឺ៖ ក្រោយពីបានចាប់ផ្តើមចងក្រងជាសមាជិកបណ្ដុំគ្រួសារកសិករពីដំបូងមានចំនួន៣៩គ្រួសារ ហើយមកទល់បច្ចុប្បន្ននេះមានសមាជិកបានកើនឡើងរហូតដល់ចំនួន៥៤គ្រួសារមានផ្ទៃដីសរុប១៦ហិកតាបាននិងកំពុងរៀបចំផែនការដាំខ្ទឹមស្លឹកជាបន្តបន្ទាប់ ហើយកសិករខ្លះបានប្រមូលផលលក់ទៅទីផ្សារក្នុងតម្លៃ ៥០០០៛ ក្នុងមួយគីឡូក្រាម រីឯប្រាក់ចំណូលប្រចាំឆ្នាំរបស់សមាជិកបណ្តុំកសិករនៅទីនោះ អាចទទួលបានពី ២ ០០០ ទៅ ៥ ០០០ ដុល្លារអាមេរិក ក្នុងមួយឆ្នាំ អាស្រ័យទៅលើទំហំដីរបស់សមាជិករបណ្តុំកសិករ នៃគ្រួសារនិមួយៗ ។
សូមបញ្ជាក់បន្ថែមថា មកទល់ឆ្នាំ ២០២០ នេះ គម្រោងកម្មវិធីបច្ចេកទេសកសិកម្មថ្មីដែលធន់និងការបម្រួលអាកាសធាតុ បានពង្រីកសកម្មភាពរបស់ខ្លួនរហូតដល់ ២៤ ខេត្ត ដែលទទួលហិរញ្ញប្បទានសម្បទាន និងឥតសំណងពី ពីមូលនិធិអន្តរជាតិសម្រាប់អភិវឌ្ឍន៍កសិកម្ម ហៅកាត់ថា IFAD៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។