សម្ដេចតេជោ ហ៊ុន សែន បញ្ជាឲ្យស្រាវជ្រាវករណីទន្ទ្រានយកដីរដ្ឋ នៅខេត្តមណ្ឌលគិរី
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី២២ ខែកក្កដា ឆ្នាំ២០២០ បានចេញសេចក្ដីសម្រេចស្ដីពី ការបង្កើតក្រុមការងារអន្តរក្រសួង ដើម្បីចុះសិក្សាស្រាវជ្រាវ លើករណីការកាប់រាន ទន្ទ្រានកាន់កាប់ដីព្រៃខុសច្បាប់ ក្នុងតំបន់ការពារធម្មជាតិ ស្ថិតក្នុងខេត្តមណ្ឌលគិរី។ ក្នុងសេចក្ដីសម្រេចនេះ មានយោងលើចំណារដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី ចុះថ្ងៃទី៨ ខែកក្ដដា ឆ្នាំ២០២០។
បើតាមប្រភពពីមន្ត្រីក្រសួងមហាផ្ទៃ បានបង្ហើបអោយដឹងថា យ៉ាងហោចណាស់មាន មន្ត្រីពាក់ព័ន្ធជាង ២០ នាក់ រួមទាំង អភិបាលខេត្ត មណ្ឌលគីរី អភិបាលស្រុកកោះញែក ស្រុក អូររាំង សមាជិកព្រឹទ្ធសភា ឧត្ដមសេនីយ៍ ។ល។ ត្រូវបានឯកឧត្ដម ប៊ិន ឈិន ឧបនាយករដ្ឋមន្ត្រី រដ្ឋមន្ត្រី ទីស្ដីការគណៈរដ្ឋមន្ត្រី គោរពស្នើសុំគោលការណ៍ពី សម្ដេចតេជោ ហ៊ុន សែន ដើម្បីកែសម្រួលភារកិច្ច និង ដកហូតមុខតំណែង ព្រោះពាក់ព័ន្ធនឹងការគប់គិតគ្នាទន្ទ្រានយកដីរដ្ឋធ្វើកម្មសិទ្ធិ។
ចំណែកលោក សេង សុវណ្ណារ៉ា អនុរដ្ឋលេខាធិការ ក្រសួងយុត្តិធម៌ ត្រូវបានដកហូតមុខតំណែង និងចាប់ខ្លួនបញ្ជូនទៅពន្ធនាគារឃុំខ្លួនបណ្ដោះអាសន្ន ពាក់ព័ន្ធនឹងការទន្ទ្រានយកដីរដ្ឋនៅខេត្តមណ្ឌលគិរីច្រើនជាង ១០០០ ហិកតា។
មហាជនមានការសាទរយ៉ាងខ្លាំងចំពោះចំណាត់ការរបស់រាជរដ្ឋាភិបាលលើមន្ត្រីទន្ទ្រានយកដីរដ្ឋទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។