អាជ្ញាធរជាតិអប្សរា រៀបចំដាំកូនឈើបំពេញនៅតំបន់ ដែលធ្លាប់កាប់ទន្ទ្រានខុសច្បាប់
ខេត្តសៀមរាប៖ កាលពីថ្ងៃទី២៣ កក្កដា ឆ្នាំ២០២០ ក្រុមការងារព្រៃឈើនៃអាជ្ញាធរជាតិអប្សរា ដោយមានការចូលរួមពីអាជ្ញាធរមូលដ្ឋាន នគរបាលការពារបេតិកភណ្ឌ និងមន្ត្រីឧទ្យាននុរក្សតំបន់ការពារទេសភាពអង្គរ បានចូលរួមដាំកូនឈើឡើងវិញនៅតំបន់ដែលរងការកាប់ទន្ទ្រានខុសច្បាប់ ដែលស្ថិតនៅខាងលិចប្រាសាទមេបុណ្យ ក្នុងភូមិស្រះស្រង់ខាងជើង សង្កាត់នគរធំ ក្រុង-ខេត្តសៀមរាប។ ដើមឈើដែលដាំនៅពេលនោះរួមមាន ដើមធ្នង់ ៥០ដើម ដើមគ្រញូង៥០ដើម និងដើមបេងចំនួន៤០ដើម។
គួរបញ្ជាក់ថា កន្លងមកព្រៃឈើក្នុងឧទ្យានអង្គររងការកាប់ទន្ទ្រានខុសច្បាស់ពីប្រជាពលរដ្ឋមួយចំនួនសម្រាប់ការពង្រីកផ្ទៃដីចម្ការ និងមួយចំនួនពីអ្នកចំណូលថ្មី។ យ៉ាងណា អាជ្ញាធរជាតិអប្សរាដោយមានកិច្ចសហការជាមួយអាជ្ញាធរមូលដ្ឋាន បានខិតខំយ៉ាងស្វិតស្វាញ ក្នុងន័យទប់ស្កាត់មិនឱ្យបទល្មើសទាំងនេះរីករាលដាលកាន់តែខ្លាំង។
ជាមួយគ្នានេះ ក្រុមការងាររបស់អាជ្ញាធរជាតិអប្សរា បានចុះដាំកូនឈើឡើងវិញ ក្នុងន័យបំពេញចន្លោះដែលបានបាត់បង់ ដើម្បីបង្កើនគម្របព្រៃឈើឡើងវិញក្នុងព្រៃនៃឧទ្យានអង្គរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។