អាជ្ញាធរជាតិអប្សរា បញ្ចុះអណ្ដើកថ្មថ្មីមួយគូ ក្នុងគ្រឹះប្រាសាទស្រះស្រង់កណ្ដាល ជំនួសអណ្ដើកចាស់
សៀមរាប៖ លោក ម៉ៅ សុខនី អ្នកគ្រប់គ្រងគម្រោងការដ្ឋានជួសជុលប្រាសាទកណ្ដាល នៃប្រាសាទស្រះស្រង់ បានឲ្យដឹងថា កាលពីថ្ងៃទី២៧ខែកក្កដា ឆ្នាំ២០២០ អាជ្ញាធរជាតិអប្សរា បានធ្វើពិធីបញ្ចុះអណ្ដើកថ្មថ្មីមួយគូនៅគ្រឹះប្រាសាទស្រះស្រង់កណ្ដាល ឲ្យស្របតាមអណ្ដើកចាស់និងតាមប្រពៃណីបុរាណ ហើយសត្វអណ្ដើកមួយគូនេះបានចម្លងថ្មីពីសត្វអណ្ដើកចាស់ដែលអ្នកជំនាញបុរាណវិទ្យា ប្រទះឃើញកប់ក្រោមគ្រឹះប្រាសាទរាប់រយឆ្នាំកន្លងមក ក្នុងខណៈពេលដែលកំពុងការធ្វើកំណាយ ដើម្បីជុសជុលប្រាសាទកណ្ដាលនោះឡើងវិញ ឲ្យដូចទម្រង់ដើម ហើយគ្រោងនឹងបញ្ចប់ការសាងសង់នៅចុងឆ្នាំ២០២០នេះ ។
លោក ម៉ៅ សុខនី បានឲ្យដឹងទៀតថា ចំពោះសត្វអណ្ដើកថ្មចាស់ ត្រូវបានយកទៅរក្សាទុកនៅសារមន្ទីរព្រះនរោត្ដមព្រះសីហនុអង្គរ ដើម្បីទុកឲ្យមនុស្សជំនាន់ក្រោយបានឃើញ និងស្គាល់ ពីវត្ថុមានតម្លៃមហាសាលមួយនេះ ព្រោះនៅពេលយកវត្ថុបុរាណទៅកប់ក្រោមដី វាធ្វើឲ្យមនុស្សជំនាន់ក្រោយមិនបានស្គាល់ ហើយចំពោះរបបគំហើញផ្សេងៗទៀត ដែលអ្នកជំនាញប្រទះឃើញជាមួយសត្វអណ្ដើកថ្មភួកនោះ អាជ្ញាធរនឹងពិធីដាក់បន្ថែមទៀតជាលើកចុងក្រោយ។
កាលពីចុងខែមេសាឆ្នាំ២០២០នេះ អ្នកជំនាញបុរាណវិទ្យានៃអាជ្ញាធរជាតិអប្សរា បានប្រទះឃើញសត្វអណ្ដើកធ្វើអំពីថ្មភួកមួយគូ និងវត្ថុបុរាណជាច្រើនបានកប់នៅគ្រឹះប្រាសាទកណ្ដាលស្រះស្រង់នេះ កំពុងធ្វើកំណាយដើម្បីជួសជុលប្រាសាទនេះឡើងវិញ ក្នុងនោះមានគ្រាប់ខ្វាតពណ៌សជាច្រើនរយគ្រាប់ , ចម្លាក់អណ្ដើកថ្មភក់ចំនួន០២ក្បាល , រូបចម្លាក់ក្បាលនាគ រួមនឹងត្រីសូល៍ចំនួន២ ដែល១មានរូបពេញលេញ និងមួយទៀតមានត្រឹមមួយបំណែកមួយ ព្រមទាំងឃើញសំណង់ឈើកប់នៅគ្រឹះប្រាសាទកណ្ដាលផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។