ឯកឧត្តម វេង សាខុន ចុះពិនិត្យចំការស្ពៃក្តោប និងស្ពៃបូកគោ នៅក្រុងសែនមនោរម្យ
កាលពីរសៀល ថ្ងៃទី២៨ កក្កដា ម្សិលមិញ ឯកឧត្តម វេង សាខុន ក្រសួងកសិកម្ម រុក្ខាប្រមាញ់ និងនេសាទ បានបន្តដំណើរមកមើលចំការបន្លែស្ពៃក្តោប និងស្ពៃបូកគោ របស់លោក គ្រី ម៉េង ឈាង នៅក្រុងសែនមនោរម្យ និងចំការបន្លែស្ពៃបូកគោមួយកន្លែងទៀត របស់លោក ឡង់ នី។
ជាមួយគ្នា កសិករទាំង ២នាក់ បានរៀបរាប់ដូចគ្នា ពីដំណើរការដាំបន្លែ មើលថែទាំ និងប្រមូលផល ដោយបញ្ជាក់ថា បន្លែស្ពៃក្តោប និងស្ពៃបូកគោទីផ្សារធំ គឺនៅភ្នំពេញ មានតម្លៃសមរម្យ សេចក្តីត្រូវការទីផ្សារខ្ពស់។ ចំពោះបញ្ហាចំបង ដែលពួកគាត់កំពុងប្រឈម គឺដើមទុនវិនិយោគ ដើម្បីពង្រីកផលិតកម្មបន្លែដូចជារោងសំណាញ់ រៀបចំប្រព័ន្ធទឹក ទីតាំងប្រផ្តុំ និងទូត្រជាក់។ល។
ក្នុងដំណើរចុះពិនិត្យនោះដែរ ឯកឧត្តមរដ្ឋមន្ត្រី បានកោតសរសើរចំពោះការខិតខំប្រឹងប្រែងរបស់កសិករទាំងពីរ និងមានការជឿជាក់ថា ទីផ្សារ និងតម្លៃបន្លែសុវត្ថិភាពនឹងល្អប្រសើរឡើងជាលំដាប់ ដោយសារការពេញនិយមរបស់អ្នកបរិភោគ ដែលគិតគូពីសុខភាពជាចំបង ហើយអ្នកដាំក៏បានអនុវត្តតាមលក្ខណ: បច្ចេកទេសត្រឹមត្រូវ ជាពិសេសបន្លែដែលមានប្រភពពីខេត្ត មណ្ឌលគីរីនេះតែម្តងដោយសារក្សេត្របរិស្ថានសម្រាប់ដំណាំបន្លែមានការលូតលាស់បានល្អ និងរស់ជាតិឆ្ងាញ់ពិសារទៀតផង។
សម្រាប់អនាគត ឯកឧត្តមរដ្ឋមន្ត្រី ណែនាំឲ្យមន្ទីរជួយធ្វើជាស្ពានចំលងរវាងអ្នកផលិត និងឈ្មួញ តាមរយ:ការចុះកិច្ចសន្យាផ្គត់ផ្គង់ ដែលកិច្ចសន្យាអនុវត្តផលិត កម្មកសិកម្មនេះ បានផ្តល់បច្ចេកវិទ្យាកសិកម្មទំនើប ដូចជាដាំបន្លែក្នុងផ្ទះសំណាញ់ ប្រើប្រព័ន្ធដំណក់ និងសាច ប្រើប្រាស់ ជី និងថ្នាំកសិកម្មត្រឹមត្រូវតាមបច្ចេកទេស ចេះសន្សំ និងផលិតជី និងថ្នាំសម្លាប់សត្វល្អិតតាមបែបធម្មជាតិ បានយកគោលការណ៍ស្តីពី “ការអនុវត្តកសិកម្មល្អ (GAP)” ។ នាឱកាសនេះ ឯកឧត្តមរដ្ឋមន្ត្រីបានប្រាក់រង្វាន់លើកទឹកចិត្តជូនពូ ឡង់ នី ចំនួន ១០០ដុល្លារ ដែលបានប្រើប្រាស់រោងសំណាញ់ ប្រព័ន្ធទឹក ដាំបន្លែបានល្អ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។