កសិករជាង ៨ពាន់គ្រួសារ រងគ្រោះដោសារជំងឺកូវីដ១៩ មកទទួលគ្រាប់ពូជបន្លែដោយឥតគិតថ្លៃ ពីប្រព័ន្ឋស្បៀងបំរុងកម្ពុជា
សៀមរាប៖ កាលពីរសៀលថ្ងៃទី២៨ ខែកក្កដា ឆ្នាំ២០២០ ប្រជាកសិករងាយរងគ្រោះ ដែលរងផលប៉ះពាល់ពីជំងឺកូវីដ១៩ ចំនួន ៨.៣៩២គ្រួសារ មកពី៤៩ភូមិ នៅឃុំទាំង៦ ក្នុងស្រុកស្រីស្នំ ខេត្តសៀមរាប បានទទួលគ្រាប់ពូជបន្លែដោយឥតគិតថ្លៃ ពីប្រព័ន្ឋស្បៀងបំរុងកម្ពុជា ដើម្បីជំរុញការដាំដុះបន្លែសុវត្ថិភាព ក្រោមអធិបតីភាពឯកឧត្តមបណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានគណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា។
លោក ង៉ាន់ ភិរុណ អភិបាលរងខេត្តសៀមរាប បានមានប្រសាសន៍ថា ការផ្តល់គ្រាប់ពូជបន្លែដោយឥតគិតថ្លៃពីប្រព័ន្ធស្បៀងបម្រុងកម្ពុជា គឺដើម្បីជំរុញការដាំដុះ បន្លែសុវត្ថិភាព ”ជាលក្ខណៈគ្រួសារ ជាការជួយបង្កើតការងារ និងបង្កើនជីវភាពប្រចាំថ្ងៃដល់បងប្អូនប្រជាពលរដ្ឋដែលមានជីវភាពខ្វះខាត ងាយរងគ្រោះ ជាពិសេសគ្រួសារបងប្អូនមួយចំនួនដែលត្រូវផ្អាកពីការងារ បងប្អូនចំណូលស្រុកមកពីប្រទេសជិតខាងដោយសារតែវិបត្តិជំងឺកូវី១៩ជាដើម ហើយដែលការដាំដុះនេះ វានឹងផ្តល់អត្ថប្រយោជន៍ និងផ្តល់ផលចំណេញដល់ពួកគាត់ដោយកាត់បន្ថយចំណាយថវិកាទៅទិញនៅទីផ្សារ ចំណេញដល់សុខភាព។
ឯកឧត្តមបណ្ឌិត វង់ សណ្តាប់ បានលើកឡើងដែរថា ការអនុវត្តប្រព័ន្ឋនេះ គឺជាទស្សនវិស័យដ៏វែងឆ្ងាយរបស់រាជរដ្ឋាភិបាល ដល់ការលើកទឹកចិត្តនិងជំរុញចលនាបង្កើនការដាំដុះក្នុងស្រុក កាត់បន្ថយការនាំចូលបន្លែពីប្រទេសជិតខាង ដែលជាពិសេសនោះ គឺផ្តោតទៅលើការយកចិត្តទុកដាក់ជាសំខាន់ជួយដល់ប្រជាកសិករគោលដៅជាអាទិភាព ដែលកំពុងប្រឈមនិងជីវភាពខ្វះខាត ឲ្យមានលទ្ធភាពរកប្រាក់ចំណូលគ្រួសារ តាមរយៈនៃការដាំដុះផលដំណាំ បន្ថែមពីលើការងារបង្កបង្កើនផលស្រូវស្រែនោះ ហើយការចែកជូននេះ មិនបានកំណត់ចំនួនគ្រួសារនោះទេ តែត្រូវបានចែកជូនដល់ប្រជាពលរដ្ឋតាមតម្រូវការជាក់ស្តែង។
សូមបញ្ជាក់ថា កម្មវិធីប្រព័ន្ឋស្បៀងបម្រុងកម្ពុជា ចាប់អនុវត្តពីឆ្នាំ២០១៦ ហើយបើគិតត្រឹមត្រីមាសទី៣ ឆ្នាំ២០២០នេះ បានចែកពូជបន្លែដោយឥយគិតថ្លៃដល់ប្រជាកសិករដែលមានបំណងដាំដុះបន្ថែម និងកសិករ កម្មករដែររងផលប៉ះពាល់ដោយជំងឺកូវីដ១៩ បានចំនួន ៣៥៧.៥១៤ គ្រួសារ នៅក្នុងខេត្តចំនួន១៥ខេត្ត ស្មើនឹង៩៩ស្រុក ហើយសម្រាប់ខេត្តសៀមរាប ការផ្តល់គ្រាប់ពូជបន្លែដោយឥតគិតថ្លៃនេះ នឹងប្រព្រឹត្តិទៅចាប់ពីថ្ងៃទី២៨ ដល់ថ្ងៃទី៣០ ខែកក្កដា ឆ្នាំ២០២០ នៅស្រុកចំនួន៣គឺ ស្រុកស្រីស្នំ , ស្រុកវ៉ារិន និងស្រុកអង្គរជុំ ដែលមានបងប្អូនប្រជាកសិករ នឹងទទួលបានចំនួន ២១.១៧៨គ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។