ទីក្រុងចំនួន២ របស់កម្ពុជា ត្រៀមខ្លួនក្លាយជាទីក្រុងទេសចរណ៍គ្មានផ្សែងបារី នៅចុងឆ្នាំ២០២១
ក្នុងកិច្ចប្រជុំពិភាក្សាពីរដាច់ដោយឡែកពីគ្នាត្រូវបានធ្វើឡើងនៅខេត្តកែប និងខេត្តកំពត នាដើមសប្តាហ៍នេះ ដើម្បីពិនិត្យលទ្ធភាពក្នុងការប្រែក្លាយទីក្រុងកែប និងទីក្រុងកំពត ជាទីក្រុងទេសចរណ៍គ្មានផ្សែងបារី នៅចុងឆ្នាំ២០២១នេះ។
ឯកឧត្ដម ហោ សារុន អនុរដ្ឋលេខាធិការក្រសួងទេសចរណ៍ បានចាត់ទុកកិច្ចប្រជុំពិភាក្សាផ្លាស់ប្តូរយោបល់នេះ គឺជាការត្រួសត្រាយផ្លូវ និងត្រៀមលក្ខណៈសម្បត្តិក្នុងការជំរុញទីក្រុងកែប និងទីក្រុងកំពត ឲ្យក្លាយជាទីក្រុងទេសចរណ៍គ្មានផ្សែងបារីនៅចុងឆ្នាំ២០២១ ដើម្បីចូលរួមពង្រឹង និងលើកកម្ពស់បរិស្ថានគ្មានផ្សែងបារីក្នុងវិស័យទេសចរណ៍។
ឯកឧត្ដមអនុរដ្ឋលេខាធិការ ក៏បានលើកឡើងពីវិបត្តិនៃជំងឺកូវីដ-១៩ ដែលរីករាលទូទាំងពិភពលោកហើយដែលយើងទាំងអស់គ្នាត្រូវចូលរួមទប់ស្កាត់កុំឲ្យជំងឺនេះរីករាលដាលក្នុងសហគមន៍ និងបានបញ្ជាក់ពីការខិតខំប្រឹងប្រែងនានារបស់ក្រសួងទេសចរណ៍ ក្នុងការដាក់ចេញនូវប្រកាសស្តីពីការដាក់ឲ្យអនុវត្តវិធានសុវត្ថិភាពទេសចរណ៍ទាំង៦ រួមមាន៖ វិធានសុវត្ថិភាពទេសចរណ៍សម្រាប់ការស្នាក់នៅ សម្រាប់ការហូបចុក សម្រាប់មធ្យោបាយដឹកជញ្ជូនតាមផ្លូវគោក ផ្លូវទឹក សម្រាប់រមណីយដ្ឋានទេសចរណ៍ និងសម្រាប់សហគមន៍ទេសចរណ៍ ដើម្បីធានាបានថា កម្ពុជានៅតែជាគោលដៅទេសចរណ៍ដែលមានសុវត្ថិភាពចំពោះភ្ញៀវទេសចរគ្រប់រូប។
ក្រុមការងារ ក៏បានចុះពិនិត្យជាក់ស្តែង វាយតម្លៃនៅតាមមូលដ្ឋានអាជីវកម្ម សេវាកម្មទេសចរណ៍ ក្នុងក្រុងទាំងពីរ ដើម្បីត្រៀមលក្ខណៈ និងរៀបចំសកម្មភាពចាំបាច់នានា ក្នុងគោលបំណងជំរុញទីក្រុងទាំងពីរឲ្យក្លាយជាទីក្រុងទេសចរណ៍គ្មានផ្សែងបារីនៅចុងឆ្នាំ២០២១ តាមការគ្រោងទុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។