ចំការផ្លែឈើមួយ ក្នុងក្រុងសែនមនោរម្យ អាចរកចំណូលបានជាង ១ម៉ឺនដុល្លារ ក្នុង១ឆ្នាំ
មណ្ឌលគីរី៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញមកមើលចំការក្រូចវល្លិ៍ ទុរេន និងផ្លែប៊ឺ ក្នុងក្រុងសែនមនោរម្យ ដែលជារបស់បងស្រី ប្រាក់ សាវី។
បងស្រី ប្រាក់ សាវី បានរៀបរាប់អំពីផលដំណាំថា បច្ចុប្បន្នដំណាំឈើហូបផ្លែខាងលើ ទទួលបានផលល្អ និងកំពុងពេញនិយមនៅលើទីផ្សារ ពិសេសផ្លែប៊ឺ សម្រាប់ភ្ញៀវអញ្ជើញមកពីភ្នំពេញ និងបញ្ជាទិញយកទៅភ្នំពេញ។ ជាមធ្យមបងស្រី អាចរកចំណូលបានពី ១០ ០០០-១៥ ០០០ដុល្លារ ក្នុង១ឆ្នាំ លើផ្ទៃដី ៧ហត។
ឯកឧត្តម វេង សាខុន បានកោតសរសើរម្ចាស់ចំការរូបនេះ ចំពោះការខិតខំប្រឹងប្រែងមើលថែរទាំដំណាំបានទទួលផលយ៉ាងល្អ និងចំណូលខ្ពស់ សម្រាប់ទ្រទ្រង់ជីវភាពគ្រួសារ កូនៗបានរៀនសូត្រជ្រៅជ្រះ គ្រួសារជួបជុំ មានសុភមង្គល។ កត្តា វិជ្ជមានទាំងអស់នេះហើយ គឺជាបំណងប្រាថ្នារបស់រាជរដ្ឋាភិបាលស្របពេលដែលសេដ្ឋកិច្ចជាតិកំពុងប្រឈមនឹងបញ្ហាដែលបណ្តាលមកពីជំងឺឆ្លងកូវីដ-១៩ និងវិស័យមួយចំនួនកំពុងអសកម្ម។
ឯកឧត្តមរដ្ឋមន្ត្រី បានលើកទឹកចិត្តឲ្យបងស្រីខិតខំប្រឹងប្រែងបន្ថែមទៀតទាំងទ្រឹស្តី និងការអនុវត្តជាក់ស្តែងធ្វើយ៉ាងណាធានាទាំងបរិមាណ និងគុណភាពសម្រាប់ផលិតផលផ្លែឈើក្នុងចំការរបស់បងស្រីដែលកំពុងមានសក្តានុពលទាំងក្នុងតំបន់ និងក្រៅតំបន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។