ឯកឧត្តម គៀត ចន្ទ័ថារិទ្ធ បើកកិច្ចប្រជុំស្តីពីការវិភាគមុខងារ និងចំនួនក្របខណ្ឌរបស់អគ្គនាយកដ្ធានអន្តោប្រវេសន៍
ភ្នំពេញ៖ នៅព្រឹក ថ្ងៃទី៣ ខែសីហា ឆ្នាំ២០២០ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានអញ្ជើញដឹកនាំកិច្ចប្រជុំ ស្តីពីការវិភាគមុខងារ និងចំនួនក្របខណ្ឌរបស់អគ្គនាយកដ្ឋានអន្តោប្រវេសន៍។
កិច្ចប្រជុំនៅអគ្គនាយកដ្ឋានអន្តោប្រវេសន៍ នាពេលនេះ ក៏មានអញ្ជើញចូលរួមពីសំណាក់ ឯកឧត្តម នាយឧត្តមសេនីយ៍ ឧត្តមសេនីយ៍ឯក អគ្គនាយករងអន្តោប្រវេសន៍, ប្រធាន-អនុប្រធាននាយកដ្ឋាន និងមន្ត្រីពាក់ព័ន្ធមួយចំនួនទៀត។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានមានប្រសាសន៍ពីការកំណត់តួនាទីភារកិច្ច និងមុខងាររបស់មន្ត្រីអន្តោប្រវេសន៍ នៅតាមនាយកដ្ឋាន និងការិយាល័យនីមួយៗ ឲ្យកាន់តែយល់ច្បាស់ពីចំណុចខ្វះខាត ត្រូវបំពេញបន្ថែម។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានណែនាំដល់ថ្នាក់នាយកដ្ឋាន ថ្នាក់ការិយាល័យ សូមឲ្យឧស្សាហ៍ប្រជុំ ណែនាំ អប់រំ ដើម្បីឲ្យមន្ត្រីបាននៅឋិតឋេរជិតស្និទ្ធជាមួយគ្នា ជាពិសេសឲ្យមានរបាយការណ៍ផែនការសកម្មភាព ប្រចាំឆ្នាំ ប្រចាំឆមាស ប្រចាំខែ ហើយអនុវត្តន៍ឲ្យបានទៀងទាត់ និងទាន់ពេលវេលា ដោយនៅពេលខាងមុខនេះ មានការឈប់សម្រាក សូមឲ្យថ្នាក់នាយកដ្ឋាន និងថ្នាក់ការិយាល័យ រៀបចំវេនប្រចាំការ ដើម្បីរងចាំទទួលបញ្ជាពីថ្នាក់ដឹកនាំ និងចូលរួមដោះស្រាយបញ្ហាចាំបាច់មួយចំនួន របស់ប្រជាពលរដ្ឋផងដែរ។
ឆ្លៀតក្នុងឱកាសនោះ ឯកឧត្តម នាយឧត្តមសេនីយ៍ អគ្គនាយក បានផ្តាំផ្ញើដល់ថ្នាក់ដឹកនាំអគ្គនាយកដ្ឋាន និងមន្ត្រីអន្តោប្រវេសន៍ទាំងអស់ ឲ្យមានការប្រុងប្រយ័ត្នខ្ពស់ និងរក្សាអនាម័យជាប់ជាប្រចាំ ដោយអនុវត្តឲ្យបានខ្ជាប់ខ្ជួន នូវវិធានការ ការពារ តាមការណែនាំរបស់ក្រសួងសុខាភិបាល អំពីជម្ងឺកូវីដ-១៩ (Covid-19 ) ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។