រថយន្ត បុកពីក្រោយម៉ូតូពេញទំហឹង ស្លាប់យុវជនម្នាក់ នៅនឹងកន្លែង
ព្រះសីហនុ៖ កាលពីវេលាម៉ោងជាង១រសៀល ថ្ងៃទី០៦ខែសីហា ឆ្នាំ២០២០ មានករណីគ្រោះថ្នាក់ចរាចរណ៍ បង្កឡើងរវាងរថយន្ត និងម៉ូតូបុកគ្នាពេញទំហឹង បណ្តាលឲ្យយុវជនម្នាក់ ស្លាប់ភ្លាមៗនៅនឹងកន្លែង ក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ។
សមត្ថកិច្ចមូលដ្ឋាន បានឲ្យដឹងថា រថយន្តបង្ក ម៉ាកម៉ាស់ស្ដា ពណ៌ស ពាក់ស្លាកលេខ ព្រះសីហនុ 2B-0097 ទិសដៅពីខេត្តព្រះសីហនុ-ភ្នំពេញ លុះមលដល់ចំណុចខាងលើ ក៏បុកពីក្រោយម៉ូតូ១គ្រឿង ម៉ាកC125 ពាក់ស្លាកលេខ ព្រះសីហនុ1F-2374 យ៉ាងពេញទំហឹង បណ្តាលឲ្យអ្នកបើកម៉ូតូនោះ ស្លាប់ភ្លាមៗតែម្តង។
អ្នកបើកបររថយន្តបង្ក ឈ្មោះ គុយ រតនៈ ភេទប្រុស អាយុ៣៨ឆ្នាំ មានទីលំនៅភូមិ៣ សង្កាត់៤ ក្រុងព្រះសីហនុ រីឯជនរងគ្រោះជាអ្នកបើកម៉ូតូ ឈ្មោះ ជា វណ្ណនាង ភេទប្រុស អាយុ១៩ឆ្នាំ ទីលំនៅភូមិស្ទឹងសំរោង ឃុំអូរបាក់រទេះ ស្រុកំពង់សីលា ខេត្តព្រះសីហនុ។
ក្រោយពេលកើតហេតុ កម្លាំងជំនាញ បានចុះពិនិត្យ និងបានអូសយករថយន្ត និងម៉ូតូទៅរក្សាទុកនៅអធិការដ្ឋាននគរបាលស្រុកកំពង់សីលា ដើម្បីចាត់ការតាមនិតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។