នាយករដ្ឋមន្ត្រីលីបង់ លាឈប់ពីអំណាច ក្រោយសោកនាដកម្មផ្ទុះដ៏កក្រើក នៅកំពង់ផែរដ្ឋធានីបេរូត
លីបង់៖ នាយករដ្ឋមន្ត្រីលីបង់ លោក ហាស្សាន ឌីអាប់ នៅថ្ងៃចន្ទនេះបានប្រកាសថា រដ្ឋាភិបាលរបស់លោកបានសម្រេចចិត្តចុះចេញពីអំណាច ក្រោយកើតមានករណីផ្ទុះដ៏កក្រើកនៅតំបន់កំពង់ផែរដ្ឋធានីបេរូត នេះបើតាមសារព័ត៌ មាន CNA នៅថ្ងៃទី១១ ខែសីហា ឆ្នាំ២០២០ ។
ការប្រកាសរបស់លោក ហាស្សាន ឌីអាប់ នេះ ធ្វើឡើងក្រោយបាតុកម្មផ្ទុះឡើងនៅទីក្រុងសំខាន់ៗរបស់ប្រទេសលីបង់ ក្នុងគោលបំណងទាមទារឲ្យរដ្ឋាភិបាលរបស់លោក ឌីអាប់ ទទួលខុសត្រូវចំពោះការធ្វេសប្រហែសដែលបានបង្កឲ្យមានសោកនាដកម្មដ៏ធ្ងន់ធ្ងរនេះ។
បន្ថែមលើនេះ ក្រុមបាតុករក៏បានទាមទារឲ្យរដ្ឋមន្ត្រីពាក់ព័ន្ធទាំងអស់ចុះចេញពីតំណែង និង បើកការស៊ើបអង្កេតរកឬសគល់ ដែលបង្កឲ្យមានហេតុការណ៍ផ្ទុះកាលពីថ្ងៃទី០៤ ខែសីហា ដែលបានផ្តាច់ជីវិតមនុស្សកើនដល់១៦៣នាក់ និងប្រមាណ៦ពាន់នាក់រងរបួសនេះផងដែរ ។
សូមរំលឹកឡើងវិញថា ហេតុការណ៍ផ្ទុះដ៏កក្រើកនៅតំបន់កំពង់ផែទីក្រុងបេរូត គឺជាការផ្ទុះសារធាតុអាម៉ូញ៉ូមនីត្រាត ដែលមានទម្ងន់រហូតដល់២.៧៥០តោនតោន ហើយត្រូវបានអាជ្ញាធរលីបង់អះអាងថា បានរក្សាទុកនៅទីនោះអស់រយៈពេល ០៦ឆ្នាំមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។