ក្រទ្បាប់រថយន្ត ស្លាប់២នាក់ របួស៥នាក់ នៅខេត្តព្រះវិហារ
ខេត្តព្រះវិហារ៖ យ៉ាងហោចណាស់មនុស្ស ២នាក់ បានស្លាប់នៅកន្លែង និង៥នាក់ទៀតបានរងរបួសធ្ងន់ស្រាល ក្នុងករណីគ្រោះថ្នាក់ចរាចរណ៍ ក្រឡាប់រថយន្ត១គ្រឿង នៅខេត្តព្រះវិហារ ខណៈនាំគ្រួសារដើរលេង កាលពីល្ងាចថ្ងៃទី២៣ ខែសីហា ឆ្នាំ២០២០។
សមត្ថកិច្ចមូលដ្ឋាន បានឲ្យដឹងថា មុនពេលកើតហេតុ រថយន្តខាងលើ ម៉ាកតូយ៉តា ពណ៌ទឹកប្រាក់ ពាក់ផ្លាកលេខភ្នំពេញ 2Z-7512 បានដឹកក្រុមគ្រួសារ ធ្វើដំណើរចេញពីខេត្តព្រះវិហារ ឆ្ពោះទៅស្រុកគូលែន លុះដល់កន្លែងកើតហេតុ តៃកុងរថយន្ត បានបន្ថែមល្បឿនឡើងវ៉ាជែងរថយន្ត១គ្រឿង តែអកុសលជ្រុលចង្កូតធ្លាក់ផ្លូវ ក្រឡាប់ជាច្រើនត្រឡប់ បណ្តាលឲ្យមានមនុស្សស្លាប់ និងរបួសតែម្តង។
អ្នកបើករថយន្តឈ្មោះ ម៉ៅ ណាល់ ភេទប្រុស អាយុ៣៩ឆ្នាំ រស់នៅភូមិបរិបូរណ៍ ឃុំត្បែងពីរ ស្រុកគូលែន ខេត្តព្រះវិហារ។ ចំណែកអ្នកស្លាប់ទាំង ២នាក់ មានឈ្មោះ ស្រី និច ភេទស្រី អាយុ២៥ឆ្នាំ និងឈ្មោះ ណាល់ ផានិត ភេទប្រុស អាយុ១២ឆ្នាំ។
ក្រោយពេលកើតហេតុ សមត្ថកិច្ចជំនាញ បានចុះជួយសង្គ្រោះ និងបញ្ជូនអ្នកជនរងគ្រោះទៅមន្ទីរពេទ្យបង្អែក។ រីឯសព ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។