ខេត្តសៀមរាប៖ តម្លៃផលស្រូវឆ្នាំនេះ កំពុងបង្ហាញនូវអត្តសញ្ញាណល្អប្រសើរ
ខេត្តសៀមរាប៖ បើតាមប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោក ទា គឹមសុទ្ធ បានមានប្រសាសន៍ថា ការងារបង្កបង្កើនផលស្រូវរដូវវស្សានៅខេត្តសៀមរាប ឆ្នាំ២០២០នេះ សម្រេចបានសរុបជិត ១៩ម៉ឺនហិកតា ស្មើនឹង១០១,៤៧ភាគរយនៃផែនការ ក្នុងនោះស្រូវស្រាលអនុវត្តបានជាង៤ម៉ឺនហិកតា, ស្រូវកណ្តាលជាង១ម៉ឺនហិកតា និងស្រូវធ្ងន់បានជាង៣ម៉ឺន៥ពាន់ហិកតា ខណៈដែលស្រុកពួកអនុវត្តបានជាង២ម៉ឺន៥ពាន់ហិកតា ហើយកំពុងច្រូតកាត់ប្រមូលផលស្រូវស្រាលបានប្រមាណជា ២០០ហិកតាហើយ លើផ្ទៃដីស្រូវស្រាលជិត៣ពាន់ហិកតា ដែលទិន្នផលក្នុង១ហិកតា២,៥តោន និង ក្រុងសៀមរាប ក៏កំពុងមានសកម្មភាពប្រមូលផលស្រូវស្រាលផងដែរ លើផ្ទៃដីប្រមាណជា៤៥០ហិកតាហើយ ក្នុងចំណោមផ្ទៃដីដែលអនុវត្តបាន ជាង៤.០០០ហិចតា ដែលទិន្នផលប្រហែលជា៣,៥តោនក្នុងហិកតា។
លោក ទា គឹមសុទ្ធ មានបន្ថែមថា នៅក្នុងអំឡុងពេលដើមរដូវនៃការប្រមូលផលស្រូវស្រាលនេះ តម្លៃស្រូវកំពុងស្ថិតក្នុងអត្តសញ្ញាណដ៏ល្អប្រសើរ គឺពួកគាត់លក់ស្រូវសើមបានពី៨០០ ទៅ ៨៥០រៀលក្នុង១គីឡូក្រាម បើជាស្រូវស្ងួតវិញពួកគាត់អាចលក់បានពី១.១០០ ទៅ ១.២០០រៀលក្នុង១គីឡូក្រាម គឺវាខុសគ្នាកាលពីឆ្នាំមុន ដែលពួកគាត់លក់ស្រូវស្ងួត បានតែពី៦៥០ ទៅ ៧០០រៀលប៉ុណ្ណោះក្នុង១គីឡូក្រាម ដែលនេះគឺជាកាលានុវត្តភាពសម្រាប់កម្ពុជា ឈោងចាប់យកឱកាសទីផ្សារកសិផលលើវិស័យស្រូវអង្ករ ក្នុងអំឡុងពេលនៃវិបត្តិកូវីដ១៩ ។
លោក បានបង្ហាញនូវការជឿជាក់លើការដឹកនាំដ៏ឈ្លាសវៃនៃប្រមុខរាជរដ្ឋាភិបាល ដែលជំរុញបានទាន់ពេលវេលាលើវិស័យកសិកម្មកម្ពុជា ខណៈពេលដែលពិភពលោកកំពុងទទួលរងវិបត្តិកូវីត១៩ ដែលស្រូវអង្ករ គឺជាប្រភពស្បៀងមិនអាចខ្វះបាន ជាក់ស្តែងសហគមន៍អ៊ឺរ៉ុបនៅតែបន្តបញ្ជាទិញ ហើយដែលជាពិសេសនោះគឺប្រទេសចិន ដោយឡែកប្រទេសវៀតណាមក៏មានតម្រូវការខ្ពស់ក្នុងការនាំចូលស្រូវអង្ករពីកម្ពុជា ដូច្នេះស្រូវអង្ករកម្ពុជា សង្ឃឹមថាមិនមានហានីភ័យលើតម្លៃធ្លាក់ចុះនោះឡើយ ៕
ប្រភពពី៖ មន្ទីរព័ត៌មានខេត្តសៀមរាប
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។