អភិបាលខេត្តកំពត កិច្ចប្រជុំស្តីពីករណីបូមខ្សាច់លុបផ្លូវទឹកចូលអ៊ូរស្តុកទឹក សម្រាប់ផលិតអំបិលរបស់ក្រុមផលិតអំបិល ក្នុងមណ្ឌលបឹងទូក
ខេត្តកំពត៖ កាលពីថ្ងៃទី២៦ ខែសីហា ឆ្នាំ២០២០ រដ្ឋបាលខេត្តកំពត បានបើកកិច្ចប្រជុំស្តីពីករណីបូមខ្សាច់លុបផ្លូវទឹកចូលអ៊ូរស្តុកទឹក សម្រាប់ផលិតអំបិលរបស់ក្រុមផលិតអំបិល ក្នុងមណ្ឌលបឹងទូក ស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត ក្រោមអធិបតីភាពដ៏ខ្ពង់ខ្ពស់ ឯកឧត្តម ជាវ តាយ អភិបាលនៃគណៈអភិបាលខេត្តកំពត។
កិច្ចប្រជុំនេះ ឯកឧត្តម អភិបាលរងខេត្ត បានផ្តល់អនុសាសន៍ដល់អង្គប្រជុំ ដូចតទៅ៖
១.ដីជាចំណីព្រែក ជាដីរបស់រដ្ឋ ដូចនេះរដ្ឋបាលខេត្តមិនមានសិទ្ធិដោះស្រាយផ្ដល់ជូនទៅបុគ្គលណាម្នាក់បានឡើយ ហើយត្រូវអនុវត្តតាមច្បាប់ដែលមានជាធរមាន។
២.ពាក់ព័ន្ធនឹងទំនាស់រវាងលោក គង់ សំណាង និងលោក ស៊ុន ណូន បើគាត់ចង់បន្តនីតិវិធីទៅតុលាការ នោះជាសមត្ថកិច្ចរបស់តុលាការជាអ្នកសម្រេច។
៣.ស្នើសុំឲ្យលោក ស៊ុន ណូន រក្សាភាពដើមនៃដីស្រែអំបិល ដោយបើកទ្វារទឹកស្រែអំបិល រក្សាភ្លឺស្រែឲ្យនៅដដែលដូចពីមុន។
៤.ចំពោះលោកស្រី សេង វួចលៀង ដែលកាប់ព្រៃកោងកាង ចំនួន ០៥ ហិកតា សុំចាត់ការតាមនីតិវិធីច្បាប់។
៥.ត្រូវអនុវត្តតាមខ្លឹមសារលិខិតលេខ០៨១ អ/គអឆក ចុះថ្ងៃទី ០៩ ខែមិថុនា ឆ្នាំ២០២០ របស់គណៈកម្មាធិការជាតិ គ្រប់គ្រង និងអភិវឌ្ឍន៍តំបន់ឆ្នេរកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។