រកឃើញហើយមេខ្លោង កាប់ទន្ទ្រានដីព្រៃ និងទិញដីព្រៃភ្នំនៅស្រុកបុទុមសាគរ ខេត្តកោះកុង
តាមប្រភពព័ត៌មានពីប្រជាពលរដ្ឋរស់នៅក្នុងឃុំថ្មស ស្រុកបូទុមសាគរ ខេត្តកោះកុង បានបង្ហើបថា មេខ្លោងដែលពូកែខាងដើរប្រមូលទិញដីព្រៃ និងកាប់ទន្ទ្រានដីព្រៃរបស់រដ្ឋនោះ គឺមានឈ្មោះ ឡាត់ នៀវ ហៅចែ នៀវ រស់នៅក្នុងភូមិថ្មស ឃុំថ្មស ស្រុកបូទុមសាគរ ខេត្តកោះកុង និងប្ដីរបស់គាត់ គេហៅតាអាតៗតែម្តង។
តាមប្រភពថា ចែនៀវនេះ គឺគាត់ដើរទិញដី ព្រៃភ្នំគ្រប់ទីកន្លែងក្នុងទឹកដីឃុំថ្មស និងមានមេក្រុមម្នាក់ឈ្មោះ សោម រ៉េត ដែលជាមេក្រុមភូមិចំលងគោ ជាអ្នកដើរទិញដីជាមួយចែនៀវនេះដែរ ហើយទីណាមានមុខមេខ្លោងឈ្មោះ ឡាត់ នៀវ ហៅ ចែនៀវ នេះ គឺមានមុខឈ្មោះ សោម រ៉េត នេះជាអ្នកជំនឹត ហើយក៏ជាអ្នកដឹងលឺនៅក្នុងការទិញដីលក់ដីភ្នំនេះដែរ។
ប្រភពច្បាស់ការពីអ្នកជំនិតរបស់ ឡាត់ នៀវ បាននិយាយថា កន្លងមក ឡាត់ នៀវ តែងតែទិញដីព្រៃឬដីភ្នំ ហើយពេលដែលគេបោះបង្គោលព្រំដី គឺគេដាក់អក្សរ A ជានិច្ច ដែលមានន័យថា តាអាតៗ ដែលត្រូវជាប្ដីរបស់ ឡាត់ នៀវ ។
តាមប្រភពពីប្រជាពលរដ្ឋទូទាំងឃុំថ្មស និងឃុំតានូន ថា ករណីទន្រ្ទានដីព្រៃនេះ អាចនឹងមានការដឹងលឺពីខាងបរិស្ថានដែរ ប៉ុន្តែមិនដឹងយ៉ាងម៉េច បែរជាខាងបរិស្ថានសម្ងំឈឹង ដោយបណ្តោយឲ្យមានការរំលោភបំពានដីរដ្ឋយ៉ាងនេះ។
យ៉ាងណាក៏ដោយ ចំពោះករណីនេះ យើងមិនអាចទាក់ទងសុំការបំភ្លឺពីលោកស្រី ឡាត់ នៀវ ដែលរងការចោទប្រកាន់បានទេ, ដោយឡែកលោក អ៊ឹង មុន្នី ប្រធានបរិស្ថានស្រុកបូទុមសាគរ បដិសេធមិនអត្ថាធិប្បាយ ដោយថា ជាប់រវល់។
យ៉ាងណាក៏ដោយ លោក ហាក់ ឡេង អភិបាលស្រុកបូទុមសាគរ បាននិយាយថា រឿងនេះលោកហ្នឹងចាត់វិធានការ ចំពោះអ្នកដែលកាប់ទន្ទ្រានដីព្រៃភ្នំអនាធិបតេយ្យ ដោយថា គាត់និងអញ្ជើញបុគ្គលនោះមកធ្វើតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។