បាតុកម្មប្រឆាំងការរើសអើងជាតិសាសន៍ ក្នុងទឹកដីអាមេរិកនៅតែបន្ត
អាមេរិក៖ បាតុកម្មប្រឆាំងការរើសអើងជាតិសាសន៍នៅអាមេរិក អូសបន្លាយរយៈពេល១០០ថ្ងៃកន្លងមកហើយ ដោយបាតុកម្មនៅតំបន់ជាច្រើន ក្នុងទឹកដីអាមេរិកក៏មានអំពើហិង្សាកើតឡើង។
ក្រុមបាតុករនៅទីក្រុង Portland រដ្ឋ Oregon បានគប់ដុំថ្ម ដបសាំងទៅលើកម្លាំងប៉ូលិស ក្នុងយប់ថ្ងៃទី១០០ នៃការធ្វើបាតុកម្មប្រឆាំងការរើសអើងជាតិសាសន៍។ ប៉ូលិសទីក្រុង Portland បានឲ្យដឹងថា អំពើហិង្សាបានកើតឡើងនៅយប់ថ្ងៃទី៥ខែកញ្ញា (ពេលវេលាអាមេរិក) នៅSoutheast Stark ក្នុងទីក្រុងខាងលើ។
ប៉ូលិសទីក្រុង Portland បានប្រកាសនៅលើបណ្តាញសង្គម Twitter នៅថ្ងៃទី៦ខែកញ្ញាថា «ក្រុមបាតុករ បានគប់ដបសាំងទៅលើកម្លាំងប៉ូលិស ប៉ុន្តែដាប់សាំងនោះបែទៅចំបាករទៅវិញ បណ្តាលឲ្យមានអ្នករងរបួស។ កម្លាំងប៉ូលិសបានព្យាយាមរក្សាសន្តិសុខសណ្តាបធ្នាប់។
ទីក្រុង Portland បានឆ្លងកាត់ការធ្វើបាតុកម្មរយៈពេល១០០ថ្ងៃកន្លងមកប្រឆាំងនិងការរើសអើងជាតិសាសន៍ និងការប្រើអំពើហិង្សាពីកម្លាំងប៉ូលិស។ មានបាតុកម្មជាច្រើនកើតឡើងដោយសន្តិវិធី ប៉ុន្តែក្រោយមក ក៏ក្លាយជាអំពើហិង្សា។
ការធ្វើបាតុកម្ម ប្រឆាំងការរើសអើងជាតិសាសន៍កើតឡើងទូទាំងអាមេរិក តាំងពីចុងខែឧសភា ក្រោយការស្លាប់ជនជាតិស្បែកខ្មៅឈ្មោះGeorge Floyd ត្រូវប៉ូលិសនៅទីក្រុង Minneapolis សង្កត់ក រហូតដល់ស្លាប់។ តាំងពីពេលនោះមក មានបាតុកម្មកើតឡើងជាបន្តបន្ទាប់ប្រឆាំងការរើសអើងជាតិសាសន៍ពីសំណាក់កម្លាំងប៉ូលិស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។