ប្រជាជនថៃជាង ១០ម៉ឺននាក់ ត្រៀមធ្វើបាតុកម្មជាថ្មី ទាមទារឲ្យរដ្ឋាភិបាលចុះចេញពីតំណែង
ថៃ៖ ក្រុមសកម្មជនប្រឆាំងរាជរដ្ឋាភិបាលថៃ កាលពីថ្ងៃពុធ ទី៩ កញ្ញា ២០២០ បានប្រកាសពីគម្រោងរៀបចំបាតុកម្មក្នុងពេលយប់ និងប្រមូលផ្តុំមនុស្សឲ្យបាន១សែននាក់ ដើរព្យុហយាត្រាទៅកាន់វិមានរដ្ឋាភិបាល នាសប្តាហ៍ក្រោយ ដើម្បីបន្ថែមសំពាធលើរដ្ឋាភិបាលគាំទ្រពីក្រោយដោយយោធា ចុះចេញពីតំណែង។
មេដឹកនាំបាតុកម្ម Panusaya Sithijirawattankul បាននិយាយថា «ពួកយើងនឹងធ្វើនៅពេលយប់ នៅបរិវេណសកលវិទ្យាល័យ នៅថ្ងៃទី១៩ កញ្ញា ហើយដើរជាក្បួន នាថ្ងៃបន្ទាប់»។
សូមរម្លឹកថា ដោយមិនខ្វល់ពីបំរាមជួបជុំទប់ស្កាត់កូវីដ១៩ ការធ្វើបាតុកម្មផ្តើមចេញពីក្រុមយុវជនប្រឆាំងរដ្ឋាភិបាលបានចាប់ផ្តើមឡើង តាំងពីខែកក្កដា បន្តអូសបន្លាយ ដោយពួកគេសម្តែងនូវការមិនពេញចិត្តចំពោះរដ្ឋាភិបាលរបស់លោកប្រាយុទ្ធ ចាន់អូចា នាយករដ្ឋមន្ត្រី ដែលធ្លាប់ដឹកនាំរដ្ឋប្រហារយោធា ទម្លាក់រាជរដ្ឋាភិបាលស្របច្បាប់ កាលពីឆ្នាំ២០១៤។ ពួកគេចោទថា ថៃមិនទាន់មានលទ្ធិប្រជាធិបតេយ្យពេញលេញនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។