វ៉ាក់សាំងកូវីដ១៩ នឹងផលិតរួចរាល់ នៅចុងឆ្នាំ២០២០នេះ
ស្វីស៖ ប្រធានអង្គការសុខភាពពិភពលោក WHO លោក ថេត្រូស អាដាណម ហ្គេប្រេយេសឹស បញ្ជាក់ថា វ៉ាក់សាំង COVID-19 អាចនឹងរួចរាល់នៅចុងឆ្នាំ២០២០ នេះបើតាមសារព័ត៌មានរ៉យទ័រនៅថ្ងៃទី០៦ ខែតុលា ឆ្នាំ២០២០ ។
ថ្លែងនៅក្នុងសន្ទរកថាបិទ នៃកិច្ចប្រជុំរបស់ក្រុមប្រឹក្សាប្រតិបត្តិអង្គការសុខភាពពិភពលោក ដែលពិនិត្យមើលលើការឆ្លើយតបជាសកល ចំពោះជំងឺ COVID-19 នៅថ្ងៃអង្គារនេះ លោក ថេត្រូស បានអំពាវនាវដល់មេដឹកនាំទាំងអស់ឲ្យមានសាមគ្គីភាព និងប្តេជ្ញាចិត្តផ្នែកនយោបាយ ដើម្បីធានាឲ្យបានថា ការចែកវ៉ាក់សាំង នឹងប្រព្រឹត្តិទៅដោយយុត្តិធម៌ និងស្មើភាពគ្នា ។
គិតមកទល់ពេលនេះ មានវ៉ាក់សាំងពិសោធន៍ចំនួន០៩ ដែលកំពុងស្ថិតក្នុងកម្មវិធី COVAX ដែលដឹកនាំដោយអង្គការសុខភាពពិភពលោក WHO ខណៈកម្មវិធីនេះមានគោលដៅចែកចាយវ៉ាក់សាំង COVID-19 ចំនួន០២ពាន់លានដូសនៅចុងឆ្នាំ២០២១ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។