ថយរថយន្តអត់ប្រយ័ត្ន កិនស្លាប់២នាក់ម្តាយកូន ខណៈជិះម៉ូតូឌុបគ្នា
ខេត្តពោធិ៍សាត់៖ យ៉ាងហោចណាស់២នាក់ ម្តាយកូន ខណៈកំពុងជិះម៉ូតូឌុបគ្នានោះ ត្រូវរថយន្តធំថយក្រោយកិនស្លាប់ភ្លាមៗ កាលពីល្ងាច ថ្ងៃទី១៣ ខែតុលា ឆ្នាំ២០២០ លើផ្លូវក្រាលក្រួសក្រហម ក្នុងភូមិបួរស្រង៉ែ ឃុំត្រពាំងជង ស្រុកបាកាន ខេត្តពោធិ៍សាត់។
បើតាមសម្តីម្ចាស់រថយន្តបង្ក ម៉ាកហ៊ីយ៉ាន់ដាយ ពណ៌(ស) ពាក់ផ្លាកលេខពោធិ៍សាត់3A -1373 បានបញ្ជាក់ថា អ្នកស៊ីឈ្នួលបើកបររថយន្តរបស់ខ្លួនឈ្មោះ ធឿន ភេទប្រុស អាយុ២៥ឆ្នាំ រស់នៅភូមិស្ទឹងកំបុត ឃុំត្រពាំងជង ស្រុកបាកាន ខេត្តពោធិ៍សាត់ បានបើកបរក្នុងទិសពីជើងទៅត្បូង លុះពេលមកដល់ចំណុចកើតហេតុ បានឈប់រថយន្ដហើយក៏បើកថយក្រោយទៅបុកអ្នកកំពុងជិះម៉ូតូពីក្រោយ ក្នុងដំណើរស្របទិសគ្នា បណ្ដាលឲ្យកិនស្លាប់ ២នាក់ម្តាយកូន នៅនឹងកន្លែងតែម្តង។
ជនរងគ្រោះទាំង២នាក់ ឈ្មោះ ឌឺ សុខឡឹក អាយុ៣២ឆ្នាំ (ជាម្ដាយ) រស់នៅភូមិស្ទឹងកំបុត ឃុំត្រពាំងជង ស្រុកបាកាន (ស្លាប់ ) និងកូនឈ្មោះ មួង ចាន់រ៉ា ភេទប្រុស អាយុ១០ឆ្នាំ (ស្លាប់)។ រីឯអ្នកបើកបររថយន្តបង្ក បានរត់គេចខ្លួនបាត់។ ក្រោយពេលកើតហេតុ សមត្ថកិច្ចបានចុះពិនិត្យ និងបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។