អ្នកជំនាញ ថា ស្រះ ត្រពាំង និងទួលបុរាណ ជាផ្នែកមួយចូលរួមចំណែកទាក់ទាញភ្ញៀវទេសចរណ៍ ក្រៅពីប្រាសាទ
ខេត្តសៀមរាប៖ លោក អ៊ឹម សុខរិទ្ធី ប្រធាននាយកដ្ឋានអភិរក្សក្នុងឧទ្យាននិងបុរាណវិទ្យាបង្ការ នៃអាជ្ញាធរជាតិអប្សរា បានបញ្ជាក់ថា ការងារអភិរក្ស ស្រះ ត្រពាំង និងទួលបុរាណ ពិតជាមានគុណតម្លៃជាច្រើន ដែលមិនត្រឹមតែ ទុកជាកេរដំណែលសម្រាប់កូនចៅជំនាន់ក្រោយប៉ុណ្ណោះនោះទេ គឺវាជាកន្លែងដែលស្តុកទឹកទុកនៅក្នុងរដូវវស្សា ការពារការជន់លិចទឹក និង សម្រាប់ប្រជាពលរដ្ឋប្រើប្រាស់ប្រចាំថ្ងៃ ហើយម្យ៉ាងទៀតវាក៏ជាចំណែកមួយ ក្នុងការទាក់ទាញភ្ញៀវទេសចរណ៍ជាតិ និង អន្តរជាតិ ក្រៅពីការទស្សនានៅតាមប្រាសាទនានា ដែលផ្ដល់ជាចំណេះដឹង លើជីវភាពរស់នៅរបស់ប្រជាជនជំនាន់ដើម ប្រវត្តិនៃតំបន់នីមួយៗ ។
លោក អ៊ឹម សុខរិទ្ធី មានប្រសាសន៍បន្ថែមថា អាជ្ញាធរជាតិអប្សរាតែងតែធ្វើការងារថែរក្សា អភិរក្ស ជួសជុល ស្រះ ត្រពាំង និងទួលបុរាណ ដើម្បីរក្សារូបរាងដើម ជាពិសេស ការធ្វើឲ្យមានភាពស្រស់បំព្រង ដើម្បីទាក់ទាញអារម្មណ៍ភ្ញៀវទេសចរណ៍ពីគ្រប់មជ្ឈដ្ឋាន ដែលអាចបង្ហាញពីតម្លៃនៃវប្បធម៌របស់ប្រទេសយើងផង និងផ្ដល់ផលចំណេញដល់ប្រជាពលរដ្ឋជុំវិញតំបន់នេះផងដែរ។
លោក អ៊ឹម សុខរិទ្ធី បានបញ្ជាក់ទៀតថា នាពេលបច្ចុប្បន្ន អាជ្ញាធរជាតិអប្សរា បានធ្វើការសហការជាមួយអាជ្ញាធរមូលដ្ឋាន និង មន្ទីរទេសចរណ៍ខេត្ត ក្នុងការកែលម្អ ស្រះ ត្រពាំង និងទួលបុរាណ ឲ្យប្រែក្លាយជាតំបន់ទេសចរណ៍រមណីយដ្ឋានប្រវត្តិសាស្ត្រ ក្នុងការទាក់ទាញភ្ញៀវទេសចរណ៍ជាតិ និងអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។