អាមេរិក ប្រកាសលក់អាវុធតម្លៃជិត ២.៤ពាន់លានដុល្លារ ទៅឱ្យតៃវ៉ាន់
អាមេរិក៖ សហរដ្ឋអាមេរិក កាលពីថ្ងៃចន្ទ បានជូនដំណឹងដល់សភា អំពីផែនការលក់ប្រព័ន្ធមីស៊ីល Harpoon ក្នុងតម្លៃជិត២.៤ពាន់លានដុល្លារទៅឱ្យកោះតៃវ៉ាន់ ខណៈប្រការនេះ កាន់តែធ្វើឱ្យចិនខឹងសម្បារជាខ្លាំង បន្ទាប់ពីទីក្រុងវ៉ាស៊ីនតោនទើបយល់ព្រមលើកិច្ចព្រមព្រៀងលក់អាវុធតម្លៃជាង១ពាន់លានដុល្លារឱ្យទីក្រុងតៃប៉ិកាលពីសប្តាហ៍មុន នេះបើតាមសារព័ត៌មាន AFP កាលពីថ្ងៃទី២៧ ខែតុលា ឆ្នាំ២០២០។
ការប្រកាសខាងលើនេះ ត្រូវបានធ្វើឡើងតែប៉ុន្មានម៉ោងប៉ុណ្ណោះបន្ទាប់ពីរដ្ឋាភិបាលទីក្រុងប៉េកាំងបានសម្រេចថា នឹងចាត់វិធានការចាំបាច់ ដើម្បីដាក់ទណ្ឌកម្មទៅលើក្រុមហ៊ុន ដែលចូលរួមពាក់ព័ន្ធក្នុងការលក់អាវុធរបស់សហរដ្ឋអាមេរិកឲ្យទៅកោះតៃវ៉ាន់ ក្នុងនោះរួមមានក្រុមហ៊ុន Lockheed Martin, Boeing Defense និង Raytheon។
ទោះជាយ៉ាងណា ក្រសួងការបរទេសអាមេរិកបានគូសបញ្ជាក់ថា សហរដ្ឋអាមេរិកនៅតែរក្សាការយកចិត្តទុកដាក់ចំពោះសន្តិភាព និងស្ថិរភាពនៅច្រកសមុទ្រតៃវ៉ាន់ និងចាត់ទុកសន្តិសុខរបស់កោះតៃវ៉ាន់ជាចំណុចស្នូលនៃសន្តិសុខ និងស្ថិរភាពនៃតំបន់ឥណ្ឌូ-ប៉ាស៊ីហ្វិច។
ក្រសួងការបរទេសអាមេរិក ក៏បានអះអាងដែរថា ការលក់អាវុធនេះ នឹងមិនផ្លាស់ប្តូរតុល្យភាពយោធានៅក្នុងតំបន់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។