ស្លាប់ម្នាក់ រងរបួសម្នាក់ ករណីគ្រោះថ្នាក់ចរាចរណ៍រថយន្ត បុកម៉ូតូពេញទំហឹង
ខេត្តកំពង់ឆ្នាំង៖ យ៉ាងហោចណាស់មានមនុស្សស្លាប់ម្នាក់ និងរងរបួសម្នាក់ ក្នុងករណីគ្រោះថ្នាក់ចរាចរណ៍រវាងរថយន្ត បុកជាមួយម៉ូតូពេញទំហឹង កាលពីវេលាម៉ោង២១ និង៥០នាទីយប់ ថ្ងៃទី១០ ខែវិច្ឆិកា ឆ្នាំ២០២០ លើកំណាត់ផ្លូវជាតិលេខ៥ ក្នុងភូមិថ្មី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
រថយន្តបង្កខាងលើ ម៉ាកហ្ស៊ុយហ្សូ ពណ៌ស ពាក់ស្លាកលេខ ភ្នំពេញ៣E. ២៩៨៥ រ៉ឺម៉កលេខភ្នំពេញ៤A. ១៧៦៥ របស់ក្រុមហ៊ុន( DN ) លុះមកដល់ចំណុចខាងលើ បានរេចង្កូតទៅបុកម៉ូតូ១គ្រឿង ម៉ាកអ៊ិចសាយទ័រ Exciter ពណ៌ក្រហមខ្មៅ ពាក់ស្លាកលេខ កណ្ដាល ១K. ០៨៩៥ ទិសដៅពីជើងទៅត្បូង បណ្ដាលឲ្យស្លាប់ម្នាក់ និងម្នាក់រងរបួសធ្ងន់។
មន្ត្រីនគរបាលចរាចរណ៍ស្រុករលាប្អៀរ បានឲ្យដឹងថា ភាគីខាងម៉ូតូឈ្មោះ ឃៀង សំបូរ ភេទប្រុស អាយុ២៩ឆ្នាំ ( ស្លាប់ ) និងរបួសអ្នករួមដំណើរម្នាក់ ឈ្មោះ ឆុង ទួន ភេទប្រុស អាយុ១៨ឆ្នាំ (រងរបួស) អ្នកទាំង២ រស់នៅភូមិទួលខ្សាច់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
ក្រោយកើតហេតុ អ្នកបើកបររថយន្ត បានចុះរត់គេចខ្លួនបាត់ ទុករថយន្តចោលនៅកន្លែងកើតហេតុ។ ករណីនេះ សមត្ថកិច្ចបានធ្វើការប្រមូលវត្ថុតាង យកមករក្សាទុកនៅអធិការដ្ឋាននគរបាលស្រុករលាប្អៀរ ដើម្បីចាត់ការបន្តតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។