សាយ រត់មកដល់ខេត្តសៀមរាប ជាមួយនឹងចំនួនថវិការៃអង្គាសឡើងដល់ជាង ៤០ម៉ឺនដុល្លារអាមេរិក
ខេត្តសៀមរាប៖ គិតត្រឹមព្រឹក ថ្ងៃទី២៣ ខែវិច្ឆិកា ឆ្នាំ២០២០ ថវិការៃអង្គាសសម្រាប់ទ្រទ្រង់មន្ទីរពេទ្យកុមារអង្គរខេត្តសៀមរាប ក្នុងយុទ្ធនាការ « រត់ដើម្បីមនុស្សធម៌ ជាមួយសាយ » បានឡើងដល់ជាង៤០ម៉ឺនដុល្លារអាមេរិកហើយ ស្របពេលលោក អ៊ួន បឋម ហៅសាយ ជាសិល្បករមួយរូបនៃកម្មវិធីសប្បុរសធម៌នេះ បានរត់មកដល់ខេត្តសៀមរាបផងដែរ ។
ការរត់មកដល់ខេត្តសៀមរាប របស់លោក សាយ នេះ គេឃើញមានវត្តមានលោក ពៅ ពិសិដ្ឋ អភិបាលរងខេត្ត មន្ត្រីរាជការ ប្រជាពលរដ្ឋ និងសិស្សានុសិស្សជាច្រើនរូប ក្នុងក្រុងសៀមរាប បានមកទទួលស្វាគមន៍ នៅចំណុចរង្វង់មូលព្រះបាទជ័យវរ្ម័នទី៧ ទន្ទឹមនោះ លោកអភិបាលរងខេត្ត រួមនិងអ្នកចូលរួមមួយចំនួនទៀត ក៏បានរត់មកកាន់អាស្រមព្រះនាងចេក ព្រះនាងចម ដើម្បីបួងសួងសុំសេចក្ដីសុខ និងរត់ឆ្ពោះទៅមន្ទីរពេទ្យកុមារអង្គរ ក្នុងក្រុងសៀមរាបតែម្ដង។
លោក ពៅ ពិសិដ្ឋ អភិបាលរងខេត្ដសៀមរាប លើកឡើងក្នុងឱកាសនោះថា ក្នុងនាមអាជ្ញាធរខេត្ដសៀមរាប សូមអរគុណចំពោះសាយ និងក្រុមការងារ ដែលលះបង់ពេលវេលារៀបចំយុទ្ធនាការ មនុស្សធម៌នេះឡើង ដែលសកម្មភាពនេះ បានរួមចំណែក ជាមួយរាជរដ្ឋាភិបាល ដើម្បីលើកកម្ពស់សុខុមាលភាពកុមារកម្ពុជា ក៏ដូចជាបានជួយទ្រទ្រង់ដល់មន្ទីរពេទ្យកុមារអង្គរខេត្តសៀមរាប ខណៈជំងឺកូវីដ-១៩ នៅតែបន្តរីករាលដាលជាសកល។
លោកអភិបាលរងខេត្ត បានបញ្ជាក់ផងដែរថា ក្រៅពីសេវាសុខាភិបាល ក្នុងក្រុងសៀមរាប មន្ទីរពេទ្យបង្អែកស្រុក ការិយាល័យស្រុកប្រតិបត្តិ មណ្ឌលសុខភាព ឬប៉ុស្តិ៍សុខភាព នៅតាមមូលដ្ឋាន បានបំពេញភារកិច្ចរបស់យ៉ាងសកម្ម ធ្វើយ៉ាងណា ផ្ដល់ការថែទាំ និងព្យាបាលទៅតាមលទ្ធភាពរបស់អង្គភាពរបស់ខ្លួន។ តែទោះជាយ៉ាងណាក៏ដោយ វិសាលភាព និងបរិមាណសេវាសុខភាពសាធារណទាំងអស់នោះ នៅតែមិនទាន់គ្រប់គ្រាន់នៅឡើយ ដែលទាមទារឱ្យមានការបំពេញបន្ថែមពីផ្នែកឯកជន និងដៃគូនានា។
លោក សាយ បញ្ជាក់ថា ក្នុងនាមលោកជាអ្នកនាំសារ នៃយុទ្ធនាការ ”រត់ដើម្បីមនុស្សធម៌ ជាមួយសាយ” លោកចង់បង្ហាញពីការចេះរំលែកគ្នាទៅវិញទៅមករបស់យុវជន និងប្រជាពលរដ្ឋក្នុងសង្គមខ្មែរ ជាពិសេសលើវិស័យសុខាភិបាលក្នុងប្រទេស ដើម្បីឲ្យមនុស្សគ្រប់រូប ទទួលបានសុខភាពល្អ។
គួរជម្រាបថា បន្ទាប់ពីចាកចេញការខេត្តសៀមរាប យុទ្ធនាការ «រត់ដើម្បីសប្បុរសធម៌ជាមួយសាយ ឬរត់ដើម្បីកុមារកម្ពុជា » នេះ លោក អ៊ួន បឋម ហៅសាយ នឹងបន្តរត់ទៅកាន់ខេត្តព្រះវិហារ និងខេត្តជាបន្តបន្ទាប់ ចំនួន ២១រាជធានី-ខេត្ត និងបញ្ចប់នៅរាជធានីភ្នំពេញ នៅថ្ងៃទី១៣ ខែមករា ឆ្នាំ២០២១ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។